अराजकताले सीमा नाघ्यो, देशको सार्वभौमसत्ता र स्वतन्त्र खतरामा छ : बंगलादेश सेना

ढाका । बंगलादेशको राष्ट्रिय सेनाले देशको स्थिति नियन्त्रणबाहिर जान लागेको र कानून व्यवस्था थप खराब हुँदै गएको भन्दै अब यो अराजकता लामो समय रहन गाह्रो हुने चेतावनी दिएको छ ।

आर्मी समारोहलाई सम्बोधन गर्दै प्रधान सेनापति जनरल वाकर उज जमानले अन्तरिम राजनीतिक नेतृत्व अराजकता नियन्त्रण गर्न असफल भएको बताएका छन् । उनले बंगलादेशी सेनाको कुनै महत्वकांक्ष नरहेको तर अराजकताले सीमा नाघेको बताएका छन् ।

सेनापतिले शान्ति व्यवस्था कायम गर्न त्यहाँको प्रहरी पूर्णरूपमा असक्षम भइसकेको र प्रहरीका उच्च अधिकारीहरुलाई शेख हसिनाको सरकारसँग जोडेर कोहीलाई जेल र कोहीलाई अदालती प्रक्रियामा लगिएपछि प्रहरीको मनोबल समाप्त भएको बताएका छन् ।

सेनापतिले भनेका छन्, ‘देशमा तत्कालन राष्ट्रिय एकता र संस्थागत अनुशासनको अत्यावश्यक भइसकेको छ । समाजमा एक अर्काबीच भइरहेको तनाव,झगडा र लडाइले बंगलादेशको सार्वभौमिकता एकदमै खतरामा परिसकेको छ । यदि तपाईँहरू एक आपसमा विमतिलाई छाड्नुको साटो निरन्तर एक अर्काको हत्या गर्ने र आतंक मच्चाउने काममा लागिरहनु हुन्छ भने देशको एकता र स्वतन्त्रता थप खतरामा पर्नेछ ।’

कुनै राजनीतिक समूहको नाम नलिई उनले सरोकारवालाहरूले एक अर्कोलाई आरोप लगाएर परिस्थिति आफ्नो पक्षमा पार्न खोजे पनि देश अराजकताको आगोमा परिसकेको सेनापतिले बताएका छन् ।

बंगलादेशमा विद्यार्थी आन्दोलनले सत्ताच्यूत भएपछि हसिना भारतमा निर्वासित छन् भने महमद युनुसको नेतृत्वमा अन्तरिम सरकार छ । अन्तरिम सरकारले निर्वाचन गर्ने भने पनि त्यहाँ अराजकता कायमै छ भने हिन्दू धार्मिक अल्पसंख्यकहरूमाथि अत्याचारले सीमा नाघेको छ ।