मधेसमा उपनिर्वाचन : दुई बजेसम्म ५७ प्रतिशत मतदान

वीरगन्ज । मधेस प्रदेशमा स्थानीय तह उपनिर्वाचनका लागि मतदान जारी छ । दिउँसो २ बजेसम्म ५७ प्रतिशत मतदान भइसकेको छ ।आइतबार बिहान ७ देखि सुरु भएको मतदानमा २ बजेसम्म ५७ प्रतिशत मतदान भइसकेको मधेस प्रदेश प्रहरीको निर्वाचन सेलले जानकारी दिएको छ ।

उपनिर्वाचनमा ७ वटा वडाअध्यक्ष पदका लागि प्रदेशका ९६ जना उम्मेदवार मैदानमा छन् । प्रदेशको सप्तरी, धनुषा, महोत्तरी र रौटहटका ७ ठाउँमा उपनिर्वाचन हुँदैछ । सप्तरीको डाक्नेश्वरी नगरपालिका वडा नम्बर– १ र ४, धनुषाको धनुषाधाम नगरपालिका–१, महोत्तरीको रामगोपालपुर वडा नम्बर– २ मतदान भइरहेको छ ।

यसैगरी रौतहटको इसनाथ नगरपालिका वडा नम्बर–७, राजपुर नगरपालिका वडा –६ र गढीमाई नगरपालिका वडा नम्बर–८ मा उपनिर्वाचन भइरहेको निर्वाचन आयोगले जनाएको छ ।

यी ७ वटै स्थानमा वडाअध्यक्ष पदको लागि मात्र निर्वाचन भइरहेको मधेस प्रहरी निर्वाचन सेल एवं प्रहरी प्रवक्ता सुवासचन्द्र बोहराले बताए । मधेस प्रहरीका अनुसार ७ वटै स्थानमा गरी कुल १७ हजार ३ सय १३ मतदाता रहेका छन् ।  

नेपाली कांग्रेस, नेकपा एमाले, नेकपा माओवादी केन्द्र, जनमत पार्टी, जसपा नेपाल, जसपा, एकीकृत समाजवादीसहितका दलहरूले उम्मेदवारी दिएका छन् । निर्वाचन आयोगका अनुसार साँझ ५ बजेसम्म मतदान हुनेछ । 

शान्तिपूर्ण रुपमा मतदान हुँदै

प्रदेश प्रहरी प्रवक्ता सुवासचन्द्र बोहराका अनुसार प्रदेशका ७ वटै ठाउँमा शान्तिपूर्ण रूपमा मतदान भइरहेको छ ।   उपनिर्वाचनमा हुने जिल्लाका सबै प्रहरी तथा प्रदेशबाट थप सुरक्षाकर्मी परिचालन गरिएको प्रदेश प्रहरी बताउँछ । 

प्रहरी प्रवक्ता बोहरा भन्छन्, ‘हामी उपनिर्वाचनका लागि जुन जिल्लामा चुनाव भइरहेको छ त्यहाँको सबै प्रहरी, त्यसपछि थपमा प्रदेश प्रहरी पनि खटाएका छौँ । त्यसकारण अहिलेसम्म कतै केही भएको छैन ।’