उपनिर्वाचनमा माओवादीले घोषित चुनावी गठबन्धन नगर्ने

काठमाडौँ । नेकपा माओवादी केन्द्रको कात्तिक २६ गतेसम्ममा स्थानीय तहको उपनिर्वाचनको उम्मेदवार सिफारिस गरिसक्न निर्देशन दिएको छ । मंसिर १६ गते हुने उपनिर्वाचनको लागि मंसिर २ गते उम्मेदवारी दर्ता हुँदैछ ।

उम्मेदवारी दर्ताको समय निर्धारण गरेर केन्द्रबाट पठाएको नीतिअनुसार उम्मेदवार सिफारिस गर्ने निर्देशन दिएको केन्द्रीय कार्यालयका मुख्यसचिव श्रीराम ढकालले बताए ।

तल्लो कमिटीले सिफारिस गरेको नामलाई केन्द्रले अनुमोदन गर्ने उनले बताए । मुख्यसचिव ढकालले पार्टीको निर्णयअनुसार एक्लै लड्ने गरी चुनाव हुने क्षेत्रमा तयारी गरिरहेको बताए ।

माओवादीले घोषित रुपमा चुनावी गठबन्धन नगरे पनि नेकपा एकीकृत समाजवादी, ‘विप्लव’ नेतृत्वको नेकपासँग आवश्यक ठाउँमा तालमेल गर्ने गरी छलफल चलाइरहेको छ । अध्यक्ष ‘प्रचण्ड’ले पनि यो उपनिर्वाचन मात्रै नभई २०८४ को आमनिर्वाचन पनि माओवादीले एक्लै लड्ने बताउँदै आएका छन् ।