हामी दक्षिणपन्थी अवसरवादको विरुद्धमा छौं : माधव नेपाल

काठमाडौं । नेकपा एकीकृत समाजवादीका अध्यक्ष माधव नेपालले एमालेका अध्यक्ष केपी शर्मा ओलीलाई लक्षित गर्दै हिटलरसँग तुलना गरेका छन् । युवा संघ नेपालको कार्यक्रमलाई सम्बोधन गर्दै नेकपा दुई तिहाइमा पुर्याएपछि अहंकार बढेपछि कम्युनिष्ट आन्दोलनमा क्षति पुर्याएको बताए ।

उनले भने, ‘हामी दुई तिहाइको अवस्थमा पुगेका थियौं, त्यो बेलामा हामीले शक्तिको सदुपयोग गर्न सक्नुपर्थ्यो । त्यो हुन सकेन । समयको सदूपयोग हुन सकेन । नेताहरुको दिमागमा घमण्ड सवार भयो । मैमत्त शक्तिको कारणले अहंकार पैदा भयो । त्यो अहिले कम्युनिष्ट पार्टीमा पनि देखिएको छ । ३० को दशकमा त्यस्तै व्यक्ति जर्मनीमा जन्म भएका थिए त्यसको नाम हिटलर हो । त्यसैले सत्ता शक्तिमा पुगेपछि मात्तिनु हुँदैन । गएको निर्वाचनमा त्यसको क्षति कम्युनष्टि आन्दोलनमा क्षति पुग्यो ।’

उनले अहिले आफूहरु दक्षिणपन्थी अवसरवादको विरुद्धमा रहेको बताए । फेरि पनि कम्युनिष्ट पार्टीहरुको विश्वास बढाउन लाग्नुपर्नेमा जोड दिए । उनले गएको निर्वाचनमा रवि लामिछाने नेतृत्वको रास्वपालाई लक्षित गर्दै सिद्धात र दर्शन नभएको पार्टीहरु उदाएपनि कतिदिन टिक्छ भन्ने टुंगो नभएको बताए ।