संविधान परिमार्जन गर्न जरुरी छ : प्रभु साह

काठमाडौँ । आम जनता पार्टी (आजपा) का अध्यक्ष प्रभु साहले संविधान परिमार्जन गर्न जरुरी रहेको छ । बुधवार प्रतिनिधिसभामा प्रधानमन्त्रीको विश्वासको मतमाथिको छलफलमा भाग लिँदै साहले यस्तो बताएका हुन् । 

‘संविधानमा रूपमा सबै थोक छ तर यसले केही गर्न सक्दैन । सबैलाई मान्य बनाउन संविधान परिमार्जन गर्न जरुरी छ’, उनले भने, ‘थोरै पनि देशप्रति देशप्रति चिन्ता छ भने बेठिकलाई ठिक ठाउँमा ल्याउन जरुरी छ ।’

उनले संविधान बनाउने बेलामा आफूले फरक मत राख्दा एक्लिने अवस्था आएको पनि बताए । ‘जसले यो संविधानलाई महान् भनेका थिए । तर, तपाईँहरूले अप्राकृतिक काम गर्दै हुनुहुन्छ भनेर मैले विगतमा भनेको थिएँ’, उनले भने । 

उनले अहिले व्याप्त फोहोरी खेलको समीक्षा गर्न जरुरी रहेको भन्दै यही फोहोरी खेलका कारण जनतामा निराशा छाएको बताए । उनले साँच्चै हामी देशलाई अघि बढाउन चाहन्छौँ भने व्यवस्थाको विषयमै छलफल गर्नुपर्ने बताए । 

उनले प्रधानमन्त्री प्रचण्ड गतिशील नेता भएको भन्दै आफूले विश्वासको मत दिने पनि बताए ।