सुशासन कायम गर्न सञ्चारमाध्यमको भूमिका महत्त्वपूर्ण छ : नेता पौडेल

काठमाडौँ । नेपाली कांग्रेसका नेता प्रदीप पौडेलले सुशासन प्रवर्दनका लागि सञ्चारमाध्यमले कलम चलाउनुपर्नेमा जोड दिएका छन् ।  सिमपानी मिडियाको वार्षिक उत्सव तथा सम्मान कार्यक्रममा उनले सुशासन कायम गर्न सञ्चारमाध्यमको भूमिका महत्त्वपूर्ण हुने बताए ।

  सबै कुरा प्राप्त भएर पनि सुशासन प्राप्त भएन भने त्यसको कुनै अर्थ हुँदैन,  उनले भने मुलुकमा सुशासन कायम हुन नसक्दा विदेश पलायन हुनेहरूको सङ्ख्या बढिरहेको छ । 

नेपाली कांग्रेसका नेता एवं पालुङटार नगरपालिकाका पूर्वप्रमुख इञ्जिनियर दीपकबाबु कँडेलले मुलुकको विकासका लागि सञ्चारमाध्यमको ठुलो भूमिका रहेको बताए । उनले सत्य तथ्य र विश्वसनीय समाचार सम्प्रेषण गर्न सञ्चारमाध्यमलाई आग्रह गरे ।

नेपाल उद्योग वाणिज्य महासङ्घका सदस्य एवं पर्यटन व्यवसायी डा रामशरण थपलियाले बिग्रँदै गएको अर्थतन्त्रलाई सही दिशा प्रदान गर्नका लागि सञ्चारमाध्यमको भूमिका महत्त्वपूर्ण रहेको बताए । 

नेकपा एमाले गोरखाका नेता मोहन भट्टराईले राजनीतिक परिवर्तनमा सञ्चारमाध्यमको भूमिका सराहनीय रहेको बताए। नेपाली कांग्रेसका नेता एवं शिक्षाविद् युवराज बस्ताकोटीले सकारात्मक समाचार सम्प्रेषणका लागि नेपाली सञ्चारमाध्यम लाग्नुपर्नेमा जोड दिए । कार्यक्रमको सभापति सिमपानी मिडिया ग्रुपका अध्यक्ष विमल भट्टले पछिल्लो समय सूचनाको भरपर्दो माध्यम डिजिटल पत्रिका भएकोले अनलाईन मिडियालाई मूलधारका मिडिया सरह व्यवहार गर्न राज्यसँग माग गरे ।