भारतसँगको सम्झौताको शर्त सार्वजनिक गर्न एकीकृत समाजवादीको माग

काठमाडौँ । नेकपा एकीकृत समाजवादीले भारतका विदेशमन्त्रीको नेपाल भ्रमणबारे ध्यानाकर्षण भएको जनाएको छ । विदेशमन्त्री एस जयशंकरको भ्रमणको क्रममा दुई देशबीच भएको सम्झौताप्रति ध्यानाकर्षण भएको जनाएको हो ।

आज बसेको सचिवालयको बैठकले भारतले नेपालमा २० करोड सम्मका परियोजनामा सिधै लगानी गर्न पाउने गरी भएको सम्झौताप्रति ध्यानाकर्षण जनाएको छ ।

बैठकपछि प्रवक्ता जगन्नाथ खतिवडाले भने, ‘नेपाल र भारतको बीचमा भारतीय विदेशमन्त्री जयशंकर नेपाल आउँदा केही सम्झौता भएको विषय चर्चामा छ । यो र यस्ता खालका धेरै सहमतिहरू सरकारले विभिन्न देशहरूसँग गरेको छ । ती के कस्ता सहमतिहरू गरिएको छ त्यो सार्वजनिक गर्न माग गर्दै हाम्रो केन्द्रीय समितिको बैठकले एउटा प्रस्ताव पनि पारित गरेको थियो त्यसैको आधारमा यसबारे विभिन्न देशहरूसँग नेपालको स्रोत साधन ऊर्जा जलस्रोतको विषयमा गरिएको सम्झौता र शर्त सरकारसँग माग गरेर निष्कर्ष निकाल्ने निर्णय गरेको छ ।’