चाडपर्वले एकापसमा एकता र सद्भाव कायम गर्छ: अध्यक्ष नेपाल

काठमाडौ । नेकपा (एकीकृत समाजवादी) का अध्यक्ष माधवकुमार नेपालले प्रत्येक जातजाति र धर्मावलम्बीका मौलिक चाडपर्वका माध्यमले एकापसमा एकता र सद्भाव कायम गर्न महत्वपूर्ण भूमिका खेल्दै आएको बताएका छन् । 

माघे सङ्क्रान्ति अर्थात् माघी पर्वको अवसरमा आज शुभकामना दिँदै अध्यक्ष नेपालले धार्मिक, सांस्कृतिक, जातीय एवं भाषिक विविधताको संरक्षणबाट राष्ट्रिय एकता सुदृढीकरण गर्न सकिने उल्लेख बताएका हुन् । 

साझा नेपाली पहिचानसहित अनेकतामा एकता कायम गर्न यस्ता चाडबाडको महत्वपूर्ण योगदान रहेको उनको भनाइ छ । नेपालीले आ–आफ्नो मौलिकताका साथ मनाउने मकर सङ्क्रान्ति अर्थात् माघी पर्वले यस वर्ष पनि नयाँ उमङ्गसहित आपसी एकता, सहकार्य, मित्रता र सहिष्णुतालाई अक्षुण राख्न सबैलाई अभिप्रेरित गर्ने विश्वास उनले व्यक्त गरेका छन् ।