एनआरएन कुँवर समूहले मार्च १६ र १७ मा महाधिवेशन गर्ने

काठमाडौं। गैरआवासीय नेपाली संघ (एनआरएनए)का अध्यक्ष विनोद कुँवर समूहले आगामी मार्चमा ११औँ महाधिवेशन गर्ने भएको छ । मार्च १६ र १७ तारिखमा काठमाडौंमा महाधिवेशन गर्ने समूहका अध्यक्ष कुँवरले बताए । महाधिवेशनमा सबै एनआरएनहरूलाई प्रतिनिधि भएर आउनसमेत उनले अनुरोध गरेका छन् ।

मार्च २०२२ मा काठमाडौंको होटल याक एण्ड यतिमा सम्पन्न एनआरएनएको १०औँ महाधिवेशनपश्चात एनआरएनए विभाजन भएको थियो । त्यसमा एनआरएनएका पूर्वअध्यक्ष शेष घलेले कुँवरलाई अध्यक्ष बनाउँदै अर्को एनआरएनए घोषणा गरेका थिए ।

'अब मार्च २०२४ मा हुने संघको ११औँ महाधिवेशन भव्य र सभ्य रूपमा सम्पन्न हुँदैछ। ३ दर्जनभन्दा धेरै देशका प्रतिनिधिहरूको प्रतिनिधित्व रहने महाधिवेशनले अल्मलिएका एनआरएनएहरूमा एउटा सुनिश्चितताको मार्ग दिनेछ,' कुँवरले भने ।

कुँवरका अनुसार २०२३ को बीचमा प्रधानमन्त्री पुष्पकमल दाहाल प्रचण्डसँग उनकै अनुरोध र निर्देशनअनुसार संघलाई एक बनाएर एकताको ११औँ महाधिवेशन गर्ने सम्झौता पत्रमा हस्ताक्षर पनि भएको थियो । तर त्यसलाई अर्को पक्षले लत्याएको उनले बताए ।संघ एकीकरण हुन नसकेपछि अल्मल्याउने प्रयास गरेको उनको आरोप छ । अब एकता र वार्ताका कुरा पनि समाप्त भएको बताए ।