शिक्षा विधेयकबारे विज्ञसँग छलफल गर्दै काँग्रेस सांसद

काठमाडौँ । नेपाली काँग्रेसले शिक्षा विधेयकमाथि विषय विज्ञसँग छलफल गर्ने भएको छ । काँग्रेसका सांसदहरूसँग छलफल गर्नका लागि शिक्षा क्षेत्र सम्बद्ध विभिन्न व्यक्तिहरूलाई बोलाइएको छ ।

बुधबार हुने छलफलमा शिक्षाविद् विद्यानाथ कोइराला र धनञ्जय शर्मा, पूर्वसचिव जनार्दन नेपाल, शिक्षा मन्त्रालयका सहसचिव हरि लम्साल, वरिष्ठ पत्रकार राजेन्द्र दाहाल लगायतलाई बोलाइएको काँग्रेस संसदीय दलले जनाएको छ ।

विषय विज्ञका रूपमा आमन्त्रितहरुले सांसदहरुलाई विधेयकमा शिक्षा क्षेत्रका समस्या र विधेयकमा उल्लेखित विषयमा छलफल गर्नेछन् । आमन्त्रितहरूलाई २० देखि ३० मिनेटको बोल्नका लागि समय उपलब्ध गराइएको छ । उनीहरू बोलिसकेपछि काँग्रेसका सांसदहरुले जिज्ञासा राख्नेछन् ।

काँग्रेसले शिक्षा विधेयकका विषयमा मंगलबार शिक्षक संम्वद्ध सङ्गठनका नेताहरूसँग छलफल गरेको थियो ।