चुस्त संगठन र आत्मनिर्भर पार्टी सदस्य हुनुपर्छ : जनार्दन शर्मा

काठमाडौँ । नेकपा माओवादी केन्द्रका बागमती प्रदेश इन्चार्ज जनार्दन शर्मा प्रभाकरले चुस्त संगठन र आत्मनिर्भर पार्टी सदस्यको अवधारणा अघि सारेका छन् । माओवादी केन्द्रको तीन महिने विशेष रूपान्तरण अभियानमा बागमती प्रदेशको पहिलो चरणको समीक्षा बैठकमा इन्चार्ज शर्माले यस्तो अवधारणामा जोड दिएका हुन् ।

‘जसरी सामाजिक विकृति र पुरातन राजनीतिक अन्त्य गर्न हामीले परिवर्तनको नेतृत्व गर्‍यौँ, अब त्यसैगरी गरिबी अन्त्यको लडाइ पनि यही पार्टीले लड्नु पर्छ’, अभियानको पहिलो समीक्षा बैठकमा शर्माले भने, ‘नछुटाउने महत्त्वपूर्ण कुरा हो यो । गरिबी अन्त्य कसरी सम्भव छ भन्ने विषय खोतल्दा सबैभन्दा पहिले हाम्रो व्यवस्थापकीय कला क्षमतामाथि प्रश्न उठ्छ ।’

शर्माले युवा पलायनलाई निकट भविष्यको डरलाग्दो तस्बिरसँग दाँजेर हेर्न सकिने बताए । ‘अहिले केही समय रेमिट्यान्स त आउला । तर जनशक्ति टिकाउन नसक्ने देशको भविष्य अन्धकार हुन्छ ।  हामीले उद्यम र रोजगारका क्षेत्रमा कुनै असाधारण कदम चाल्न सकेनौँ भने भावी पुस्ताले धिक्कार्ने छ’, शर्माले भने । 

उनले सबैभन्दा पहिले आफूभित्रको जनशक्तिको क्षमता अभिवृद्धि जरुरी रहेको बताए । उनले जनताले हेर्न र बुझ्न सक्ने समाजवाद चाहियो भनिरहेका उल्लेख गर्दै अब किताबको समाजवादले मात्रै जनताको आवश्यकता पुरा नगर्ने बताए ।

‘समाजवादको गफमा जनता अलमलिने दिन गइसके, त्यसैले सबैभन्दा पहिले हामी क्षमतावान् र सक्षम बन्नुपर्छ ।’पार्टीले उदाहरणीय काम गरेपछि मात्रै जनताले विश्वास गर्ने अवस्था आउने भन्दै शर्माले आगामी समय व्यवहारिक समाजवादको समय भएको बताए ।