अनेरास्ववियुका विद्यार्थीहरुलाई देख्दा विगतको सम्झना ताजा भएर आयो : माधव नेपाल

काठमाडौं । नेकपा (एकीकृत समाजवादी) का अध्यक्ष माधवकुमार नेपालले पार्टी निकट अनेरास्ववियुको स्थायी कमिटी बैठकलाई सम्बोधन गरेका छन् ।

आज (शनिबार) काठमाडौंमा आयोजित बैठकलाई सम्बोधन गर्दै उनले आफूले पढ्दाको समयलाई समेत स्मरण गरे । उनले अनेरास्ववियुको लामो इतिहास रहेको बताउँदै अनेरास्ववियुका विद्यार्थीहरुलाई देख्दा विगतको सम्झना ताजा भएर आएको बताए । माक्र्सवादी विचारबाट आफू १३ वर्षदेखि नै प्रभावित भएको उनले स्मरण गरे । आफू त्यसबेला पढाइमा पनि साह्रै तेज भएको उनले स्मरण गरे ।

‘तपाईँहरुलाई देख्दा विद्यार्थी कालको सम्झना ताजा भएर आएको छ । जम्माजम्मी १७ वर्षको उमेरमा म कम्युनिष्ट पार्टीको सदस्य भएको थिएँ । माक्र्र्स वादी विचारतर्फ म जम्माजम्मी १३ वर्षको उमेरमा नै प्रभावित भएको थिएँ । १३ वर्षमा जब म कक्षा १० मा पुगेको थिएँ, मैले १४ वर्षको उमेरमा त एसएलसी नै पास गरेको । मभन्दा मेरा जेठा दाजुहरु सबै जुनियर । पढाइमा तेज भएको हुनाले म दुई क्लास टपेर माथि पु्गेको थिएँ । हुन त मेरो जन्मिएको नाम तेजकुमार नै हो । न्वारनको नामै तेजकुमार,’– उनले भने ।