नेपालको अर्थतन्त्र बिचौलिया र ठूला व्यापारीको घेराभित्र छ: रघुजी पन्त

काठमाडौं । नेकपा एमालेका स्थायी कमिटी सदस्य तथा सांसद रघुजी पन्तले नेपालको अर्थतन्त्र बिचौलिया र सीमित ठूला व्यापारीको घेराभित्र रहेको बताएका छन् । सोमबार बसेको प्रतिनिधि सभाको बैठकमा बोल्दै उनले यस्तो बताएका हुन् ।

बैठकमा बोल्दै पन्तले भने, ‘कमिसन एजेन्ट र केही प्रमुख व्यापारिक घरानाहरूको दबाब र प्रभावबाट अर्थतन्त्रलाई मुक्त गर्नु पर्ने आजको आवश्यकता रहेको छ । नेपालको अर्थतन्त्रलाई बिचौलियाहरूको हातबाट मुक्त गर्ने हो ।’

बीमाको लाइसेन्स, ब्रोकरको लाइसेन्स, विद्युत् आयोजनाको लाइसेन्सदेखि सेनाको हतियार खरिदमा समेत बिचौलियाहरू निर्णायक हुने गरेको उनले बताए । त्यस्तै, कसलाई कहाँ पठाउने पर्‍यो भनेर सबैभन्दा पहिला बिचौलियाहरूले निर्णय गर्ने गरेको उनको भनाई छ ।