नदीमा डुबेर एक युवकको मृत्यु

बाँके। बाँकेका एक युवकको नदीमा डुबेर मृत्यु भएको छ ।इलाका प्रहरी कार्यालय कोहलपुरका अनुसार ३६ वर्षीय कमल साहानीको जेठिनाला नदीमा नुहाउने क्रममा डुबेर मृत्यु भएको हो । मृतक साहानी बैजनाथ गाउँपालिका–४ बोरिङ बस्तीका हुन् । 

प्रहरीका अनुसार साहानी आज बिहान ९ बजे घरदेखि दुई सय मिटर दक्षिण पर्ने नदीमा नुहाउन गएका थिए । उनलाई नदीमा डुब्दै गरेको अवस्थामा छिमेकीले देखेपछि उद्धार गरेका थिए ।  उनको उपचारका क्रममा मेडिकल कलेज कोहलपुर मृत्यु भएको प्रहरीले जनाएको छ । ​मृतक साहानीसँगै उनका जेठान दत्त पुन पनि रहेका थिए । घटनाको वास्तविक विवरण आउन बाँकी रहेको र घटनाको अनुसन्धान भइरहेको प्रहरीले जनाएको छ ।