कर्णाली प्रदेश : सरकारमा सहभागी काँग्रेसका मन्त्रीहरुको शपथ आज

काठमाडौं । नेकपा माओवादी केन्द्र नेतृत्वको कर्णाली प्रदेश सरकारमा सामेल हुने नेपाली काँग्रेसका मन्त्रीहरुको शपथग्रहण आज हुने भएको छ । कर्णालीमा एमालेले छाडेको ३ मन्त्रालयहरुमा काँग्रेसले आफ्ना मन्त्रीहरु पठाएको हो । उनीहरुले आजै शपथ लिने तयारी गरेका हुन् ।

उनीहरुले आज साढे १२ बजे सपथग्रहण गर्ने प्रदेश प्रमुख कार्यालयले जनाएको छ । कांग्रेसले आर्थिक मामिला तथा योजना मन्त्रीमा बेदराज सिंह, उद्योग, पर्यटन, वन तथा वातावरण मन्त्रीमा कृष्णकुमार बिसी र सामाजिक विकास मन्त्रीमा खड्क पोखरेललाई सिफारिस गरेको थियो । यी मन्त्रालयहरु पहिले एमालेले लिएको थियो ।

केन्द्र सरकारको समीकरण अनुसार नै प्रदेशस्तरमा पनि नयाँ गठबन्धन बन्न थालेको हो । काँग्रेसका नयाँ मन्त्रीहरुले बुधबार नै शपथ लिने भनिएतापनि आन्तरिक विवादका कारण शपथ हुन सकेको थिएन । नेकपा एमाले २०७९ चैत २६ गते कर्णाली प्रदेश सरकारबाट बाहिरिएको थियो ।