कोशी प्रदेश : माओवादीले मुख्यमन्त्री कार्कीलाई दिएको समर्थन तत्काल फिर्ता नलिने

सफल खबर संवाददाता

शुक्रबार, १० चैत्र २०७९, १९ : ३२
कोशी प्रदेश : माओवादीले मुख्यमन्त्री कार्कीलाई दिएको समर्थन तत्काल फिर्ता नलिने

विराटनगर । नेकपा माओवादी केन्द्र कोशी प्रदेश संसदीय दलका नेता इन्द्र बहादुर आङ्बोले कोशी प्रदेशका मुख्यमन्त्री हिक्मत कुमार कार्की नेतृत्वको सरकारलाई दिएको समर्थन तत्कालै फिर्ता नलिने बताएका छन् ।

शुक्रबार विराटनगरस्थित प्रदेश सभा भवनमा पत्रकार सम्मेलन आयोजना गर्दै संसदीय दलका नेता आङ्बोले कोशी प्रदेशमा अन्य प्रदेशको जस्तो राजनैतिक अवस्था नभएको र विशेष परिस्थिति रहेकाले सरकारबाट फिर्ता हुने सम्भावना पनि नभएको जानकारी दिए । उनले कार्की नेतृत्वको सरकारलाई ६० जना सांसदको समर्थन रहेकाले वैकल्पिक सरकार बारे सोच्न नसकिने बताए ।

फरक प्रसंगमा नेता आङ्बोले प्रदेश सभाको संरचनाका कारण कोशी प्रदेश नामाकरण गरिएको र नामबारे विवाद आएकाले तत्काल प्रदेश सरकारलाई आन्दोलनरत पक्षसंग वार्ता र सम्वाद गर्न पनि आग्रह गरे । उनले सरकारले पनि शान्तिपूर्ण आन्दोलनमा बल प्रयोग गर्न नहुने र आन्दोलनरत पक्षलाई संयमताका साथ आन्दोलन गर्न आग्रह गरे ।