स्रोत नखुलेको साढे ३८ लाख रुपैयाँसहित एक युवक पक्राउ

जनकपुरधाम । स्रोत नखुलेको साढे ३८ लाख रुपैयाँसहित जनकपुरधामबाट एक युवक पक्राउ परेका छन्। पक्राउ पर्नेमा महोतरीको भंगहा नगरपालिका १ बस्ने २१ वर्षीय सुवम राज चौवे रहेको जिल्ला प्रहरी कार्यालय धनुषाले जनाएको छ।

निर्वाचनलक्षित विशेष सुरक्षा योजनाअनुरूप आइतबार साँझ करिब साढे ४ बजेको समयमा भारतबाट भन्सार छली अवैध रूपमा रकम नेपाल ल्याउँदै गरेको सूचनाको अधारमा जनकपुरधाम उपमहानगरपालिका–२१ कुर्थाबाट युवकलाई उक्त रकमसहित नियन्त्रणमा लिएको प्रहरी प्रवक्ता प्रहरी नायब उपरीक्षक प्रदीपबहादुर क्षेत्रीले जानकारी दिए।

१५० सिसीको अनटेस्ट मोटरसाइकलमा सवार चौवेले बोकेको कालो रंगको व्यागबाट एक हजार दरको २९ बण्डलमा २९ लाख र पाँच सयको १९ बण्डलमा साढे ९ लाख गरी साढे ३८ लाख बरामद गरिएको छ।

बरामद गरिएको रकमसहित युवकलाई आवश्यक कारवाहीका लागि जनकपुर भन्सार कार्यालय धनुषामा पठाईएको जिल्ला प्रहरी कार्यालय धनुषाले जनाएको छ।