लुम्बिनी प्रदेशमा गठबन्धनको सिट बाँटफाँट सजह रुपमा हुन्छ : पुन

बुटवल । आगामी मंसिर ४ गते हुने निर्वाचनमा लुम्बिनी प्रदेशमा गठबन्धन दलहरुबीच सिट बाँटफाँट सहज रुपमा गर्ने नेतहरुले प्रतिवद्धता जनाएका छन् । उनीहरुले  दलहरुको  सांगठनिक हैसियत र वितमा पाएको मत आधारमा सिट बाँटफाँट गर्नुपर्ने आवश्यकता औंल्याएका छन् । 

रिपोर्टर्स क्लब नेपाल लुम्बिनी प्रदेशले बिहीबार बुटवलमा गरेको साक्षात्कार कार्यक्रममा बोल्दै काँग्रेसका लुम्विनी प्रदेशका सभापति अमर सिंह पुनले गठबन्धनभित्रको दलको संगठनिक हैसियत बुझ्ने र जित्न सक्ने व्यक्तिलाई उम्मेदार बनाइने बताए । आगामी चुनावमा गठबन्धनमा जान नेपाली काँग्रेस तयार रहेको तर सबै ठाउँमा दलहरुको हैसियतको आधारमा सिट बाँटफाँट गर्दा जित्न सकिने उनको भनाइ छ । 

कार्यक्रममा नेकपा एमाले लुम्विनी प्रदेशका उपाध्यक्ष एंव प्रदेश सांसद भोज प्रसाद श्रेष्ठले पाँच दलीय गठबन्धन एमालेसँग एक्लै लड्न नसक्ने अवस्थामा रहेकाले बाध्य भएर गठबन्धन बनाएको बताए । उनले  देश र जनताको पक्षमा  गठबन्धन नरहेको पनि जिकिर गरे । नेता श्रेष्ठले नागरिता ऐन, एमसीसी, एसपीपी जस्ता कुरालाई गठबन्धनले बढवा दिएर देशका लागि अहितपूर्ण काम गरेको आरोप लगाए । एमाले बलियो भएकाले गठबन्धन गर्नुपर्ने बाध्यता रहेको उनले बताए । उनले एमालेले बहुमत ल्याउने पनि जिकिर गरे ।

नेकपा माओवादी केन्द्रका केन्द्रीय सदस्य तथा लुम्बिनी प्रदेश संसदीय दलका प्रमुख सचेतक तुलाराम घर्तीले नेपाली राजनितिमा विश्वासको संकट भएको बताए । उनले अघिल्लो स्थानीय तहको चुनावलाई हेर्दा पार्टीभित्र र गठबन्धनमा विश्वासघात भएको केलाउँदै  गठबन्धन भित्रका दलहरुले विश्वासको वातावरण सिजर्ना गर्नुपर्ने बताए  ।

साक्षात्कारमा नेकपा एकीकृत समाजवादी लुम्बिनी प्रदेश सचिव राजु गुरुङले एउटै दलका नेताले चुनाव जित्दा अहंकार बढ्दै गएको बताउँदै आगामी चुनावमा युवा पुस्तालाई जिताउनु पर्ने औल्याए ।