भरतपुर महानगरमा रेनु दाहालको अग्रता झनै फराकिलो बन्दै, ५ हजार १६७ को मतान्तर

चितवन । भरतपुर महानगरपालिका प्रमुख पदमा सत्तारुढ गठबन्धनकी उम्मेदवार रेनु दाहालले अग्रता झनै फराकिलो बन्दै गएको छ  । पछिल्लो ७० हजार ७७५ मतगणनाको परिणाम अनुसार उनले २७ हजार ५२३ मत पाएकी छिन् । उनको ५ हजार १६७ मतको अग्रता कायम छ ।

मतगणनाको शुरुवाती चरणमा निकटतम प्रतिष्पर्धीसँग धेरैथोरै मतले मतान्तर हुँदै आएकोमा अहिले भने दाहालले फराकिलो मतान्तर बनाउन सफल भएकी छिन् ।

यस्तै, नेकपा एमालेका उम्मेदवार विजय सुवेदीले २२ हजार ३६० मत पाएका छन् । अर्का  प्रमुख पदका स्वतन्त्र उम्मेदवार जगन्नाथ पौडेलले ९ हजार ६०२ मत पाएका छन् ।

उपप्रमुख पदमा भने नेपाली काँग्रेसका चित्रसेन अधिकारी २९ हजार ६७५ मतका साथ अग्रस्थानमा छन् । अर्का प्रतिष्पर्धी राप्रपाकी हिमला गुरुङले १७ हजार ३९३ मत पाएकी छन् । 

महानगरको वडा नम्बर १५ को जारी मतगणनामा काँग्रेसका उम्मेदवारले अग्रता कायम गरेका छन् । उनले १ हजार ३८ मत प्राप्त गर्दा निकटतम प्रतिष्पर्धी एकिकृत समाजवादीका उम्मेदवारले ७१८ मत प्राप्त गरेका छन् ।