गठबन्धन अहिलेको आवश्यकता हो, कसैले दायाँबायाँ गर्नुहुन्नः प्रचण्ड

चितवन । नेकपा माओवादी केन्द्रका अध्यक्ष प्रचण्डले गठबन्धन अहिलेको आवश्यकता भएको बताएका छन् ।

उनले प्रतिगमनकारी शक्तिसँग लडिरहेको गठबन्धन भविष्यमा पनि निरन्तर रहिरने भन्दै स्थानीय तह चुनावमा कसैले दायाँबायाँ गर्न नहुने बताए । 

चितवनमा रहेका प्रचण्डले स्थानीय तहमा भएको गठबन्धनअनुसार भोट हाल्न आह्वान गरे । उनले भने, ‘माओवादीले काँग्रेसलाई पनि भोट हाल्नुपर्छ । काँग्रेसले माओवादी होस् वा समाजवादी जसपा आवश्यकताअनुसार मत हाल्नुपर्छ । हामी एक भएर प्रतिगमनलाई हराउनु पर्छ ।’

उनले गठबन्धनलाई सशक्त बनाउन काँग्रेसले भरतपुरमा माओवादीका उम्मेदवारलाई भोट हाल्ने पनि बताए । यसमा काँग्रेस इमान्दार रहेको उल्लेख गर्दै प्रचण्डले गठबन्धनले नै २० वर्षसम्म देश चलाउने योजनासहित अघि बढेको बताए । 

उनले ओली प्रवृत्ति घातक रहेको भन्दै यसलाई जनताले समयमै चिन्न जरुरी रहेको पनि बताए । चितवनमा एमालेले अनावश्यक भ्रम फैलाउन खोजेको प्रति संकेत गर्दै प्रचण्डले हारको मानसिकता पहिल्यै देखिएकाले कस्तो नतिजा आउँछ भन्ने स्पष्ट भइसकेको बताए ।