संसद् समावेशी प्रतिनिधित्वका लागि संघर्षको परिणाम भएको ‘प्रचण्ड’को दाबी

काठमाडौँ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ ले वर्तमान संघीय संसद् सहिदहरूको बलिदान र लामो राजनीतिक संघर्षको परिणामस्वरूप बनेको समावेशी संरचना भएको बताएका छन्।

प्रतिनिधि सभाको मंगलबारको बैठकलाई सम्बोधन गर्दै उनले संसद् बाहिरी रूपमा भवनका रूपमा देखिए पनि यसको आधारमा ठूलो त्याग, संघर्ष र ऐतिहासिक आन्दोलनहरू रहेको धारणा राखे।

उनका अनुसार समाजका विभिन्न वर्ग, जाति, लिंग र समुदायको प्रतिनिधित्व सुनिश्चित गर्न विगतमा विभिन्न चरणका आन्दोलनहरू गरिएको थियो, जसको परिणति स्वरूप अहिलेको समावेशी संसद् निर्माण भएको हो।

‘प्रचण्ड’ले इतिहासका विभिन्न आन्दोलन, सशस्त्र तथा शान्तिपूर्ण संघर्ष र पछिल्लो जेन जेड आन्दोलनसम्मका सहिद, बेपत्ता, घाइते तथा अभियानकर्मीहरूप्रति सम्मान व्यक्त गरे।

उनले संसद् निर्माणलाई केवल भौतिक संरचना नभई बलिदानको आधारमा उभिएको राजनीतिक उपलब्धि भएको टिप्पणी गरे।

सोही अवसरमा उनले राष्ट्रिय स्वतन्त्र पार्टीको हालको राजनीतिक सफलताप्रति बधाई व्यक्त गरे। उनले उक्त पार्टीले हालको निर्वाचनमा उल्लेखनीय परिणाम हासिल गरेको भन्दै त्यसका लागि रवि लामिछाने र बालेन शाह लाई पनि बधाई दिएका छन्।