स्थानीय निर्वाचनका लागि ८७ प्रकारका मतपत्र डिजाइन

काठमाडौं । आगामी वैशाख ३० गते हुने स्थानीय तहको निर्वाचनका लागि निर्वाचन आयोगले ८७ प्रकारका मतपत्र छापेर (डिजाइन) गरेर जिल्ला जिल्लामा पठाइरहेको जनाएको छ ।

शनिबार आयोगले गरेको पत्रकार सम्मेलनमा प्रमुख निर्वाचन आयुक्त दिनेशकुमार थपलियाले स्थानीय निर्वाचनका लागि ८७ प्रकारका मतपत्र डिजाइन गरेर विभिन्न जिल्लामा पठाउने काम भइरहेको बताए ।

उनका अनुसार अघिल्लो पटकको चुनावमा १० प्रकारमा मात्र मतपत्र रहेको थियो तर, यस वर्ष डिजाइनको संख्या बढाइएको छ । निर्वाचन आयुक्त थपलियाले आइतबारदेखि सामाजिक सञ्जालमा निर्वाचन आचारसंहिता उल्लंघन भए नभएको बारे आयोगले अनुगमन गर्ने पनि बताए ।

आयोगले सामाजिक सञ्जालमा निर्वाचन आचारसंहिता पालना गरेको नगरेको भन्नेबारे अनुगमनका लागि अनुगमन टोली खटाउन लागिएको पनि उनले जानकारी दिए । सामाजिक सञ्जालमा अनावश्यक विकृतिहरुलाई रोक्न अनुगमन टोली खटाइएको उनले बताए ।

आयुक्त थपलियाले देशभर निर्वाचन आचारसंहिता कार्यान्वयनका लागि स्थानीय प्रशासनलाई परिचालन गरिएको पनि बताए । उनका अनुसार उम्मेदवार टुङ्गो लागेपछि आचार संहिता लागू भए नभएकोबारे कडाईका साथ अनुगमन गरिनेछ ।