काठमाडौं । क्रिप्टोकरेन्सीमार्फत तेल र ग्यासको भुक्तानी स्वीकार गर्ने विषयमा रुसले विचार गरिरहेको खुलासा भएको छ । रुसको युनाइटेड रसिया पार्टीका नेता पाभेल जभाल्नीलाई उद्धृत गर्दै बीबीसीले जनाएअनुसार रुसले ‘सहिष्णु मुलुकहरू’ ले रुसी तेल र ग्यासको भुक्तानी बिट्कोइन क्रिप्टोकरेन्सीमार्फत गर्न सक्नेबारे विचार गरिरहेको हो ।
रुसी संसद्को उर्जा समितिका प्रमुख रहेका उनले उर्जा निर्यातबाट प्राप्त भुक्तानीको वैकल्पिक बाटो खोजिरहेको बताएका हुन् । चीन र टर्कीले ‘रुसमाथि प्रतिबन्धात्मक दबाब’ नदिएको भन्दै यस्ता सहिष्णु मुलुकले रुसी उर्जाको भुक्तानी क्रिप्टोकरेन्सीमार्फत् गर्न सक्नेबारे विचार भइरहेको उनको भनाइ छ ।
युक्रेनमाथि रुसी आक्रमण लगत्तै अमेरिका, बेलायत, युरोपेली युनियनजस्ता आर्थिक महाशक्तिले रुसमाथि आर्थिक प्रतिबन्धको घोषणा गरेपछि यो वर्ष रुसी मुद्राको भाउ २० प्रतिशत सम्म घटेको छ ।यद्यपि रुसको उर्जा निर्यातमा भने कमी नआएको र रुस अझै ग्यासको विश्वमा सबैभन्दा ठूलो र तेलको दोश्रो ठूलो निर्यातकर्ता रहेको बताइएको छ ।
यद्यपि क्रिप्टोकरेन्सी स्वीकार गर्ने रुसी कदमले विश्व उर्जा बजारमा उर्जाको मूल्यमा ठूलो हलचल आउने विश्लेषकहरुको भनाइ छ । यो वर्षमात्रै बिट्कोइन क्रिप्टोकरेन्सीको भाउमा ३० प्रतिशतको उतारचढाव आएको छ ।
यसबाहेक चीनजस्ता मुलुकमा बिट्कोइन प्रतिबन्धित रहेकाले यसबारे पनि अन्यौल रहेको बीबीसीले जनाएको छ ।
प्रतिक्रिया दिनुहोस
सफल खबर संवाददाता
शुक्रबार, ११ चैत्र २०७८, १३ : ४९
लेखकबाट थप