प्रकाश सपूतको पक्षमा उभिए डा. बाबुराम

काठमाडौं । तत्कालीन माओवादी जनयुद्धका प्रभावशाली नेता समेत रहेका जनता समाजवादी पार्टीका संघीय परिषद् अध्यक्ष डा. बाबुराम भट्टराईले प्रकाश सपूतको गीत सही रहेको बताएका छन् । 

माओवादीका नेता कार्यकर्ताले जनयुद्धका महिलालाई नै बद्नाम गर्नेगरी सपूतले गीत ल्याएको भनि आलोचना गरिरहेका बेला भट्टराईले भने गीतमा आपत्ति मान्नुपर्ने कुरा केही नरहेको बताएका हुन् । 

‘म पनि जनयुद्धको एक अगुवा हुनुको नाताले  प्रकाश सपूतको गीतमा टिप्पणी गर्ने अधिकार राख्छु र भन्छु– त्यसमा आपत्ति मान्नुपर्ने कुरा छैन।गीतले जनयुद्धको विरोध गरेको छैन।अपूर्ण क्रान्तिका पीडा दर्शाएको छ । त्यस निम्ति क्रान्तिलाई नयॉ ढंगले अगाडि बढाउने पो हो । गीतका सर्जकलाई किन धम्काउने ?’, भट्टराईले ट्वीटरमा भनेका छन् । 

भट्टराईले ‘तथ्यबाट सत्य खोज’ भनेर मार्क्सेली चिन्तन पद्धतिले पनि भन्ने उल्लेख गर्दै भनेक छन्, ‘अनुसन्धानको क्रममा मैले प्रत्यक्ष बुझेको छु–महिलाहरू आफ्नो सन्तान र लोग्नेको उपचारनिम्ति देह बेच्न बाध्य छन्। हिजो जनमुक्तिका निम्ति बन्दुक बोक्नेहरू पेट पाल्न देह बेच्दैछन, यो सत्य स्वीकारौं ।’