गाँजालाई लागूऔषधबाट हटाउँछौँ, खुला गर्न कानुन संशोधन गर्नेछौँ : स्वास्थ्यमन्त्री खतिवडा

काठमाडौँ । स्वास्थ्यमन्त्री विरोध खतिवडाले औषधिजन्य प्रयोग र नगदे बालीका रूपमा गाँजालाई लिनुपर्ने बताएका छन् । उनले गाँजालाई खुला गर्न कानुन संशोधन गर्ने तयारी भइरहेको बताएका छन्।

गाँजालाई वैधानिक रूपले खुला गर्नुपर्छ भन्दै लामो समयदेखि वकालत गर्दै आएका स्वास्थ्यमन्त्री खतिवडाले अहिले भइरहेको कानुनमा एकदुईवटा दफा संशोधन गरेर गाँजालाई लागूऔषधको श्रेणीबाट हटाउने जानकारी दिए।

‘नयाँ कानुन बनाउने होइन, अहिले भइरहेको कानुनमा एक दुईवटा दफा संशोधन गर्ने हो’ एक मिडिया हाउससँगको कुराकानीमा  उनले भने, ‘गाँजालाई लागुऔषध भनिएको ठाउँमा त्यसलाई संशोधन गरेर औषधिजन्य प्रयोजनका लागि लिनलाई कानुन संशोधन गर्ने तयारीमा सरकार लागिरहेको छ । अहिलेसम्म यो संशोधन प्रक्रिया पूरा भइसक्नुपर्नेमा विभिन्न राजनीतिक समस्याका कारण दलहरूबीच गम्भीर छलफल गर्न नपाएको र संसद बैठकसमेत अवरूद्ध रहेकाले ढिलाइ भइरहेको उनले बताए।