माधव नेपालको ओलीलाई जवाफ : मेराविरुद्ध कुप्रचार नगर्नूहोस्, यो पदको लडाइँ होइन

सफल खबर संवाददाता

शनिबार, १२ भदौ २०७८, १७ : ५५
माधव नेपालको ओलीलाई जवाफ : मेराविरुद्ध कुप्रचार नगर्नूहोस्, यो पदको लडाइँ होइन

काठमाडौँ । नवगठित नेकपा (एकीकृत समाजवादी) पार्टीका अध्यक्ष माधवकुमार नेपालले केपी शर्मा ओलीले आफूविरुद्ध कुप्रचार गरेको बताएका छन् ।

CG Developers Tansen Cement box

आफ्नो पार्टी निकट पेसागत महासङ्घ, नेपाल बागमती प्रदेश समितिले शनिबार ललितपुरमा आयोजना गरेको एक कार्यक्रममा नेपालले पदका लागि कहिल्यै पनि लडाइँ नगरेको पटकपटक दोहो¥याए । उनले एमालेका दोस्रो पुस्ताका नेताहरूलाई पार्टीमा आउन आह्वान गरेका छन् । अध्यक्ष नेपालले पार्टी विभाजनपछि आफूहरूलाई साथ नदिएका एमालेका दोस्रो पुस्ताका नेताहरू पार्टीमा आए नेतृत्व छाड्न तयार रहेको घोषणा समेत गरे । 

नेपालले भने, ‘आउनुहोस् दोस्रो पुस्तालाई नेतृत्व हस्तान्तरण गर्न म अहिले पनि तयार छु । केही वर्षपछि राजनीतिबाटै बिदा भइहाल्छु । यो पदको लडाई होइन, यो । विचारको लडाई हो, यो । सिद्धान्तको लडाई हो यो । मूल्य र मान्यताको लडाई हो यो ।’

अध्यक्ष नेपालले केपी ओलीको झुट प्रचारको भ्रममा नपर्न पनि पार्टीका नेता, कार्यकर्तालाई सचेत गराए । उनले भने, ‘खाली कूप्रचार बाहेक केही पनि छैन । यस्ता झूटा प्रचारको भ्रममा कोही पनि नपर्नुहोस् । उनीहरूको  काम नै गोयबल्स शैलीको प्रचार गर्ने हो । मान्छेको चरित्र हत्या गर्ने प्रवृत्ति हो । यस्ता प्रवृत्ति भएका मान्छेहरू इमानदार, क्रान्तिकारी कम्युनिस्ट हुन सक्छन् ?’