महन्थ ठाकुरले सर्वोच्च अदालतमा दायर गरेको रिट निवेदनको सुनुवाई न्यायाधीश कुमार रेग्मीको इजलासमा

काठमाडौँ । पार्टीको आधिकारिकता छिनोफानो गर्ने निर्वाचन आयोगको निर्णयविरुद्ध जसपाका अध्यक्ष महन्थ ठाकुरले सर्वोच्च अदालतमा दायर गरेको रिट निवेदनको सुनुवाई न्यायाधीश कुमार रेग्मीको इजलासमा हुने भएको छ।

सर्वोच्चमा न्यायाधीश रेग्मीको इजलासमा सो मुद्दाको पेशी आइतबारका लागि तोकिएको हो। आयोगले गएको बिहीबार पार्टीका केन्द्रीय कार्यकारिणी परिषदका सदस्यलाई सोमबार आधिकारिकता टुंग्याउन आफ्नो आधिकारिक परिचयपत्र लिएर आउन भनेको छ।

जसपाको ५१ सदस्यीय कार्यकारिणी परिषदमा जसको पक्षमा बहुमत पुग्छ उसैलाई दलको आधिकारिकता दिने तयारी आयोगले गरेपछि ठाकुरले त्यसलाई रोक्न माग गर्दै शुक्रबार सर्वोच्च अदालतमा रिट निवेदन दर्ता गरेका थिए।

उनले आफूले दल सम्बन्धी ऐनको दफा ५१ बमोजिम अद्यावधिकका लागि दिएको निवेदन अस्वीकार गरि यादवले दफा ४४ (१) अनुसार दिएको निवेदनमाथि सुनुवाइ गरेको गैरकानूनी भएको जिकिर निवेदनमा गरेका छन्।