जसपाको विवाद कायमै, दुवै पक्ष आज निर्वाचन आयोग जाँदैं

काठमाडौं । एक वर्ष अगाडी आफुहरुको पार्टी फोड्न प्रधानमन्त्री ओलीले दल विभाजन सम्बन्धी अध्यादेश ल्याउने देखि सांसद समेत अपहरणमा महेश बस्नेतलाई परिचालन गरेको सम्मको आरोप लगाँउदै तत्कालिन राजपा र समाजवादी पार्टी रातारात मिलेका थिए । तर ठिक त्यसैको एक् वर्ष पछि उनै प्रधानमन्त्री ओलीलाई सरकारमा टिकाउने र गिराउने भन्नेमा जसपाभित्रको विवादले फेरि पार्टीलाई विभाजित बनाएको छ ।

पार्टीमा उपेन्द्र बावुराम पक्षसँग बहुमत छ । प्रधानमन्त्री ओलीले नै भताभुंग पारिदिएको प्रतिनिधीसभातिर भने मन्त्री बन्ने लोभमै महन्थ र राजेन्द्रसँग धेरै सांसद थिए । ओलीले पनि २० जनामध्ये ११ जनालाई त आफनो क्याविनेटमा मन्त्री नै बनाएका थिए । तर त्यो दुर्इ साता पनि टिकेन । १२ दिनमै जसपा नेताहरु सरकारबाट हटनु पर्यो ।

अहिले जसपाभित्रको बहुमत र आधिकारिकताका लागि निर्वाचन आयोगमा दुवै पक्ष पुगेका छन् । आयोगले पनि बहुमत पक्षलाई  निर्णय नदिएर नेकपा शैलीमै ओलीलाई सहज हुने गरी जसपाभित्रको आन्तरिक राजनीतिमा पनि अलमलाउने काम गरिरहेको छ । आयोगले तटस्थता देखाउन नसकेको आरोप लागिरहेका बेला आयोगले आज भने दुवै पक्षलाई आन्तरिक मेलमिलापका लागि बोलाएको छ ।

जसपाको उपेन्द्र यादव पक्षले राजनीतिक दल सम्बन्धी ऐन ४३ र ४४ बमोजिम पार्टीको आधिकारिकतामा दाबी गर्दै आयोगमा निवेदन दिएको थियो । यादव पक्षको निवेदनपछि आयोगले महन्थ ठाकुर पक्षलाई १५ दिनभित्र जवाफ दिन भनेको थियो । महन्थ पक्षले जवाफ दिएपछि आयोगले दुवै पक्षलाई मेलमिलापका लागि बोलाएको हो ।

कोभिड–१९ संक्रमणको जोखिम कायमै रहेकाले भिडभाड हुने भन्दै ७–७ जनालाई मात्र उपस्थित हुन भनेको छ । आयोगका प्रमुख आयुक्त, आयुक्त, आयोगका केही कर्मचारी, दुवै पक्षका नेताहरु र कानुन व्यवसायी  छलफलमा बस्न लागेका हुन् । दुई पक्षबीच आपसी समझदारी कायम भए सोही अनुसार निर्णय हुनेछ । सहमति नभए इजलास गठन प्रक्रियाबाट अघि बढ्ने छन् । मेलमिलापका लागि बोलाए पनि  जसपाभित्रको नेताहरुको चर्काचर्कीले त्यो सम्भावना छैन् ।