​‘जसपा’ विवाद निरुपणमा ‘नेकपा’ शैली पछ्याउदै निर्वाचन आयोग

काठमाडौं । प्रधानमन्त्री केपी ओलीले आफ्नो सरकार टिकाउन जनता समाजवादी पार्टी (जसपा) भित्रको महन्थ ठाकुर र राजेन्द्र महतो पक्षलाई आफ्नो पक्षमा पारेपछि विभाजित जसपाको आधिकारिकतामा निर्वाचन आयोगले गत जेठ ३० मा दिएको निर्णयले आयोगको निश्पक्षतामा प्रश्न उठिरहेको छ ।

५१ जना केन्द्रीय कार्यकारिणी समिति सदस्यमध्ये ३१ जना उपेन्द्र बाबुराम पक्षमा भएर आयोगमा निवेदन दिँदा समेत एक अर्काले गरेका कारवाही वैद्यता नदेखिएको भन्दै आयोगले निर्णय लिएको थियो । ठिक नेकपा शैलीमा आयोगले निर्णय लिएको भन्दै यसको निश्पक्षतमा धेरैले प्रश्न उठाए । उपेन्द्र बाबुराम पक्षले यस विरुद्द सर्वाेच्चमा रिट हाल्न जाने सम्मको चेतावनी दिए । अध्यक्ष उपेन्द्र यादवले विज्ञप्ती नै जारी गरेर आयोगको निर्णयमा कानुनी र राजनीतिक संर्घषको विधिबाट उपचार खोजिने पनि जनाएका थिए ।

माओवादी केन्द्रका नेता नारायणकाजी श्रेष्ठले त जसपाको विवादमा आयोगले गरेको निर्णय र तत्कालिन नेकपाको निर्णय सम्मलाई दाँजेर आयोग प्रधानमन्त्री केपी ओलीको कठपुतली नै बनेको आरोप लगाएका थिए । त्यसपछि भने जसपाको महन्थ राजेन्द्र पक्षले केन्द्रीय कार्यकारिणी समिति सदस्य नै थप गरेर आयोगमा नामावली पठायो । उपेन्द्र बाबुरामले भने केन्द्रीय कार्यकारिणी समिति बैठक बोलाएको थियो ।

हिजो विहिवार बसेको जसपाको उपेन्द्र बाबुराम समुहले निर्वाचन आयोगमा फेरि एकपटक आधिकारिकता दावी गर्न निवेदन दिने निर्णय गरेको छ । बैठकपछि जसपा नेता गंगा श्रेष्ठले सफलखवरसँग पार्टी निर्णय सुनाउँदै भने,–‘जसपाभित्र उत्पन्न विवाद निरुपणका लागि राजनीतिक दल सम्बन्धि ऐन २०७३ को दफा ४३ र ४४ बमोजिम दलको बहुमतको निर्णय कार्यान्वयन तथा पार्टीलाई ऐन, नियम र विधानसम्मत सञ्चालन गर्न गराउन निर्वाचन आयोगको मिति २०७८-२-३० को निर्णयले बाधा उत्पन्न भएकाले आधिकारिकताका लागि निर्वाचन आयोगमा लिखित दाबीसहितको निवेदन दिने ।’

उपेन्द्र बावुराम पक्ष आज नै निवेदन बोकेर निर्वाचन आयोग जाने तयारीमा जुटेको छ । जसपाले लुम्बिनी प्रदेश सभाका सदस्यहरु सन्तोषकुमार पाण्डे, विजयबहादुर यादव, कल्पना पाण्डे लम्साल र सुमन शर्मा रायमाझीलाई राजनीतिक दल सम्बन्धि ऐन २०७३ को दफा २८ को उपदफा ३ बमोजिम स्पष्टीकरण समेत सोधेको छ ।  स्पष्टीकरणको चित्तबुझ्दो जवाफ नआएमा ऐन र विधान अनुसार आवश्यक कारबाही गर्ने निर्णय पनि जसपाले गरेको श्रेष्ठले बताए ।

केन्द्रीय कार्यकारिणी र केन्द्रीय समिति सदस्यहरुको कार्यबिभाजनका लागि ठोस प्रस्ताव तयार गर्न ७ सदस्यीय कार्यदल समेत जसपाको केन्द्रीय कार्यकारिणी समितिको बैठकले गरेको छ । जसमा, मृगेन्द्रसिंह यादव, हिसिला यमी, रेणु यादव, गंगा श्रेष्ठ, रामसहाय यादव, रणध्वज कन्दङ्वा र इस्तियाक राई रहेको कार्यदल गठन गरिएको छ । कार्यदललाई ७ दिनभित्र प्रतिवेदन बुझाउन निर्देश बैठकले गरेको छ ।