अविलर वर्षासंगै बाढीले मनाङमा एकअर्का गाउँबीच सम्पर्क बिच्छेद

सफल खबर संवाददाता

बुधबार, ०२ असार २०७८, ०८ : ०१
अविलर वर्षासंगै बाढीले मनाङमा एकअर्का गाउँबीच सम्पर्क बिच्छेद

काठमाडौं । भारी वर्षासँगैको बाढीपहिरोले हिमाली जिल्ला मनाङका एकअर्का गाउँसँगको सम्पर्क नै बिच्छेद गराइदिएको छ । पहिरो र कटानले ठाउँठाउँमा आउजाउ रोकिएको छ भने सबैभन्दा बढी जोखिममा परेको तालगाउँसम्म आउजाउ निकै नै कठिनपूर्ण बनेको प्रहरीले बताएको छ । तालगाउँसम्म थप जनशक्ति पठाउन पनि सकिने अवस्था नरहेको प्रहरीले बताएको छ ।  

मनाङका प्रहरी प्रमुख डिएसपी सुवास खड्काका अनुसार मानवीय क्षति हुनबाट रोकेपनि भौतिक क्षति भएको बताए । उनका अनुसार सदरकुमाम चामेमा पाँचवटा पक्कि र केही कच्ची घर बाढीमा बगेका छन । राती वर्षा कम हुँदा खोलामा वहाव घटेको भएपनि बिहान फेरि वर्षा सुरु भएपछि वहाव बढ्न थालेको छ ।

सबैभन्दा बढी घर नासोँ गाउँपालिका–१ तालमा डुबानमा परेका थिए । तालमा झन्डै ६० घर रहेपनि ती सबैजसो घरमा पानी पसेको छ । सञ्चार र सडक सम्पर्क बिच्छेद हुँदा तालसम्म पुग्ने बाटो पनि छैन । तालसम्म पुग्ने सडक पुरै बिच्छेद भएको छ । तीनवटा काठे र २ वटा पक्कि पुल बगेका छन ।

‘हामी स्थानीयसँग बढो कठिनका साथ सम्पर्कमा त छौ । तर, आउजाउ सहज छैन । तत्काल पुग्ने अवस्था नै छैन,’ उनले भने, ‘किनकी त्यहाँसम्म पुग्ने बाटो नै छैन । पुल नै बगेका छन ।’ तालका बासिन्दा पाल टाँगेर बसेको उनले बताए । कपितय आफन्तकहाँ र धारापानीसम्म पुगेर आश्रय लिएको पनि खड्काले बताए । ‘एक गाउँबाट अर्को गाउँसम्म आउजाउ गर्न सहज छैन,’ उनले भने ।  

उनका अनुसार २०५३ मा मनाङमा यसैगरि बाढी आएको थियो । सदरमुकाम चामेका बासिन्दालाई हालै निर्माण सकिएको कारागार भवनमा राखिएको उनले बताए । त्यसबाहेक गाउँपालिकाको भवनमा पनि स्थानीयलाई राखिएको छ । घर छाडेका स्थानीय तत्काल फर्किने अवस्था पनि नरहेको उनले बताए । बिस्थापितलाई स्थानीय तहले खानाको व्यवस्था गरेका छन ।