भारतमा नयाँ कोरोना संक्रमितको संख्या घट्दो, मृत्युदर भने बढ्दो

एजेन्सी । केही समय अगाडी सम्म कोरोना संक्रमणको हटस्पट बनेको भारतमा अहिले दिनप्रति दिन नयाँ कोरोना संक्रमितको संख्या स्वात्तै घट्ने क्रम शुरु भएको छ । संक्रमितको संख्या घटेपनि मृत्युदर बने उकालो लागेको छ ।

 बितेको २४ घण्टामा भारतमा ८४ हजार ३ सय ३२ नयाँ कोरोना संक्रमित भेटिएका छन् । यो बितेका ७० दिन यताकै कम संख्या रहेको भारतीय सञ्चार माध्यमले उल्लेख गरेका छन् ।  संक्रमितको संख्या घटे पनि मृत्युदर भने फेरि उकालो लाग्दै सोही अवधिमा ४ हजार २ जना संक्रमितको मृत्यु भएको छ ।

यो अवधिमा १ लाख २१ हजार ३ सय ११ जना संक्रमणमुक्त भएका छन्। अहिलेसम्म भारतमा २ करोड ९३ लाख ५९ हजार १ सय ५५ जना संक्रमित भएका छन्। ती मध्ये २ करोड ७९ लाख ११ हजार ३ सय ८४ जना संक्रमण मुक्त भएका छन्।

३ लाख ६७ हजार ८१ जनाले भने ज्यान गुमाएका छन्। अहिले भारतमा १० लाख ८० हजार भन्दा धेरे सक्रिय संक्रमित रहेका छन् । भारतले आफ्ना २४ करोड ९६ लाख भन्दा धेरै नागरिकलाई कोरोना भाइरसविरुद्धको खोपको कम्तीमा पहिलो मात्रा लगाइसकेको छ।