भारतमा दुई महिनायताकै सबैभन्दा कम संक्रमित थपिए,  २४ घंटामा १ लाख १ हजार जनामा संक्रमण

एजेन्सी । कोरोना संक्रमणको हटस्पट बनेको भारतमा दुई महिनायताकै सबैभन्दा कम नयाँ कोरोना संक्रमित भेटिएका छन् । भारतीय संचारमाध्यमहरुका अनुसार आइतबार देशभरिमा १ लाख १ हजार २ सय २३ जना नयाँ संक्रमित थपिएका छन् भने २ हजार ४ सय ४६ जना संक्रमितले ज्यान गुमाएका छन्।

आइतबार थपिएका नयाँ संक्रमितको संख्या अप्रिल ४ यताकै सबैभन्दा कम दाबी गरिएको छ भने  मृतकको संख्या अप्रिल २२ पछि पहिलो पटक २५ सयभन्दा तल झरेको हो ।  एक महिनाअघि मे ६ मा भारतमा एकैदिन ४ लाख १४ हजार मानिसमा कोरोना संक्रमण पुष्टि भएको थियो। भारतमा अहिले नयाँ संक्रमितसँगै परीक्षण गरिएकालाई कोरोना पोजेटिभ हुने दर पनि घटेको छ।

भारतमा अहिलेसम्म २ करोड ८९ लाखलाई कोरोना संक्रमण भएको छ भने ३ लाख ४९ हजारले ज्यान गुमाएका छन् । कोरोनाभाइरसको दोस्रो लहरले आक्रान्त बनेको भारतमा पछिल्ला चार सातादेखि देशभरि नै संक्रमण ओह्रालो लागिरहेको छ।