पार्टीको कार्यकारिणी समितिको बैठक निर्धारित समयमै : उपेन्द्र यादव

काठमाडौँ । जनता समाजवादी पार्टी (जसपा) का अध्यक्ष उपेन्द्र यादवले पार्टीको कार्यकारिणी समितिको बैठक निर्धारित समयमै हुने जनाएको छ ।

दुवै अध्यक्षको सहमतीमा बैठक यसअघि नै तोकिएको थियो । तर शुक्रबार अर्का अध्यक्ष महन्थ ठाकुरले विषम परिस्थितीलाई मध्यनजर गर्दै बैठक स्थगितको सूचना जारी गरेका थिए । यता अर्का अध्यक्ष महतोले शनिबार र आइतबारका लागि तोकिएको बैठक स्थगित नभएको र तोकिएकै समयमा हुने जनाएका हुन्।

उनले विज्ञप्तिमा भनेका छन्, ‘देशको वर्तमान परिस्थितिमा विभिन्न विषयहरुमा विचार–विमर्श गरि निष्कर्षमा पुग्नु पर्ने भएको हुँदा कार्यकारिणी समितिको बैठक राखिएको छ।

सो बैठक स्थगित नभएको हुनाले सम्पूर्ण पदाधिकारी एवम् केन्द्रीय कार्यकारिणी समिति सदस्यहरुलाई जानकारीसहित निर्धारित समय र स्थनमा उपस्थित हुन अनुरोध छ।’ बैठक बिहान ११ बजेपछि पार्टी केन्द्रीय कार्यालय बालकुमारीमा बस्ने जनाइएको छ ।