प्रतिनिधि सभा निर्वाचनसम्बन्धी संशोधन विधेयक राष्ट्रिय सभाबाट पारित

काठमाडौँ । प्रतिनिधि सभा सदस्य निर्वाचन (पहिलो संशोधन) विधेयक, २०८३ राष्ट्रिय सभाबाट सर्वसम्मत रूपमा पारित भएको छ। प्रतिनिधि सभाबाट सन्देशसहित आएको उक्त विधेयक आइतबार बसेको राष्ट्रिय सभाको बैठकले कुनै मतभेद बिना स्वीकृत गरेको हो।

बैठकमा सांसदहरूले निर्वाचन प्रक्रियामा समावेशिता र प्रतिनिधित्वलाई अझ स्पष्ट र प्रभावकारी बनाउनुपर्ने भन्दै केही संशोधन प्रस्ताव राखेका थिए। तर दर्ता भएका तीनवटै संशोधन प्रस्ताव पछि सम्बन्धित सांसदहरूले नै फिर्ता लिएका थिए।

छलफलका क्रममा उठेका प्रश्नहरूको जवाफ दिँदै कानुन, न्याय तथा संसदीय मामिला मन्त्री सोबिता गौतमले समावेशी प्रतिनिधित्वसँग सम्बन्धित विषयहरूलाई आगामी निर्वाचनसम्बन्धी कानुन परिमार्जनको क्रममा सम्बोधन गर्ने सरकारको तयारी रहेको जानकारी दिइन्।

उनले मधेशी, दलित, पछाडि पारिएका समुदाय तथा अपांगता भएका व्यक्तिहरूको प्रतिनिधित्व सुनिश्चित गर्ने विषय सकारात्मक भएको उल्लेख गर्दै ती पक्षहरू विधेयकको मूल उद्देश्यमै समेटिएको स्पष्ट गरिन्।