मेरो जीवनकै सबैभन्दा कठिन दिन आज : योगेश भट्टराई

काठमाडौं । नेकपा एमालेका नेता योगेश भट्टराईले आफ्नो राजनीतिक जीवनकै कठिन दिन आज भएको बताएका छन् ।  प्रधानमन्त्री दाबी गर्न नेपाली कांग्रेसका सभापति शेरबहादुर देउवाको पक्षमा हस्ताक्षर नगरेका भट्टराईले यस्तो बताएका हुन् । 

एमालेकै माधवकुमार नेपाल पक्षका भनिएका नेता भट्टराईले अन्तिममा देउवाको पक्षमा हस्ताक्षर नगर्ने निर्णय गरेका थिए । तर, वरिष्ठ नेता माधवकुमार नेपाल भने आफ्ना पक्षमा खुलेका २६ सांसदको हस्ताक्षर बोकेर देउवालाई साथ दिँदै राष्ट्रपति निवास पुगेका थिए । 

सोही प्रसंगलाई लिएर भट्टराईले सामाजिक सञ्जाल फेसबुकमा भनेका छन्, ‘मेरो राजनीतिक जीवन कै सबैभन्दा कठिन दिन आज । नेकपा एमालेको एकतालाई जोगाउन सकिन्छ कि भन्ने आशाले मैले आजको निर्णय लिएको हुँ । सहि गरेंकी, गलत गरें इतिहासको कठोर मूल्याङ्कनमा खडा छु ।’