माधवकुमार नेपालको राष्ट्रपतिलाई प्रश्न– मेरो हस्ताक्षर पहिल्यै कसरी आयो ?

काठमाडौं । नेकपा एमालेका नेता माधवकुमार नेपालले राष्ट्रपति विद्यादेवी भण्डारीलाई आफू यहीँ बस्दाबस्दै मेरो हस्ताक्षर पहिल्यै कसरी आयो भनेर प्रश्न गरेका छन् । 

कांग्रेस सभापति शेरबहादुर देउवालाई प्रधानमन्त्री बनाउन १४९ सांसदको हस्ताक्षर लिएर शीतल निवास पुगेका नेता नेपालको हस्ताक्षर पहिले नै प्रधानमन्त्री केपी शर्मा ओलीले राष्ट्रपति समक्ष बुझाएका थिए । ओलीले बुझाएको हस्ताक्षरमा माधवकुमार नेपालले आफ्नो हस्ताक्षर देखेपछि उनले राष्ट्रपतिसमक्ष कसरी आफ्नो नाम पहिल्यै आएको भनेर प्रश्न गरेका थिए ।

यस प्रश्नमा राष्ट्रपतिले कुनै जवाफ नदिएको स्रोतको दाबी छ । नेता नेपालले पनि राष्ट्रपतिलाई संविधानले दिएको अधिकार प्रयोग गर्न आग्रह गरेका थिए । हस्ताक्षर बुझाउने क्रममा नेकपा माओवादी केन्द्रका अध्यक्ष पुष्पकमल दाहालले संविधान बमोजिम अघि बढ्न आग्रह गरेका थिए । नेकपा माओवादी केन्द्रका प्रवक्ता नारायणकाजी श्रेष्ठले केपी शर्मा ओलीले संवैधानिक हिसाबले दाबी गर्नै नमिल्ने बताए।