बुटवलमा निषेधाज्ञा उल्लंघन गर्ने तिनजना कारागार चलान

बुटवल ।  निषेधाज्ञा उल्लंघन गर्ने ३ जनालाई रुपन्देहीमा कारागार चलान गरिएको छ । जरिवाना बुझाउन नसकेको भन्दै उनीहरुलाई कारागार चलान गरिएको हो ।

जिल्ला प्रहरी कार्यालय रुपन्देहीले बिहीबार निषेधाज्ञा उल्लंघन गर्ने ८ जनालाई संक्रामक रोग ऐन २०२० को दफा ३ को उपदफा २ बमोजिम सजाय गरेको थियो ।

तीमध्ये ५ जना जरिवाना बुझाएर छुटे भने अरू ३ जनाले जरिवाना बुझाउन नसकेपछि कारागार चलान गरेको जिल्ला प्रहरी कार्यालय रुपन्देहीले जनाएको छ । 

निषेधाज्ञा उल्लंघन गर्ने ७ पुरुष र १ महिलालाई सम्झाइबुझाइ गर्दा प्रहरी अधिकृतलाई समेत काममा बाधा पुर्‍याएको भन्दै उनीहरुलाई कैद सजाय माग गर्दै जिल्ला प्रशासन कार्यालय रुपन्देहीमा पठाएको प्रहरीले जनाएको छ।