प्रधानमन्त्रीले संसद्सँग बदला लिँदैछन्, जनताले उचित समयमा हिसाब–किताव गर्नेछन् : गगन थापा

काठमाडौँ । सांसद गगनकुमार थापाले अहिलेको सरकार रहुञ्जेल संसदको अपमान, उपेक्षा, तिरस्कार गर्ने काम अझै बढ्दै जाने बताएका छन् ।

मंगलबार प्रतिनिधिसभा बैठकको शुन्य समयमा बोल्दै नेपाली काँग्रेसका उनले प्रधानमन्त्री केपी शर्मा ओलीले संसद र सांसदको मात्र अपमान गरेको नभइ जनताको अपमान गरेको उल्लेख गरे । जनताको अपमानको यथोचित समयमा जनताले हिसाब–किताब गर्ने उनको भनाइ छ ।

 उनले भने, ‘कहिले प्रश्न छल्न हठात संसद् स्थगित, कहिले पार्टीभित्रको बिरोधी तह लगाउन संसद् भंग, अनि अहिले प्रतिनिधिसभा भंग सही थियो भनेर सावित गर्नका लागि संसदलाई कामविहीन बनाउने प्रपञ्च । यो विधेयक अधिवेशन हो । हामी काम गर्न तयार छौँ । एसिड आक्रमणकारीलाई कारवाही गर्न बनाएको विधेयक अघि बढाउन दिएन भनेर हल्ला गर्ने, तर संसदलाई एउटा विधेयक पनि नदिने, अनि विधेयकलाई कानुन बनाउन चाहिने राष्ट्रियसभाको बैठक पनि नबोलाउने ?’