प्रचण्ड माधव समुहको सचिवालयले डाक्यो स्थायी कमिटि र केन्द्रिय कमिटि बैठक, नागरिकता र परिचयपत्र सहित उपस्थित हुन सर्कुलर

काठमाडौं । नेपाल कम्युनिष्ट पार्टी (नेकपा) प्रचण्ड–नेपाल समूहको आज बसेको सचिवालय बैठकले पार्टी स्थायी कमिटी र केन्द्रीय कमिटी बैठक बोलाउने निर्णय गरेको छ ।

बैठक २०७७ फागुन १९ गते दिउँसो १ बजे पार्टी केन्द्रीय कमिटीको बैठक पार्टी कार्यालय पेरिसडाँडा, कोटेश्वरमा बस्ने र सम्पुर्ण सदस्यहरुलाई सक्कल नागरिकता र पार्टीको परिचयपत्र सहित अनिवार्य उपस्थितिको लागि अनुरोध गरिएको केन्द्रिय कार्यालयका सचिव श्रीराम ढकालले जनाएका छन् । 

सिंहदरबारमा बसेको बैठकले प्रतिनिधिसभा अधिवेशनमा प्रस्तुत हुने रणनीति तय गर्न बैठक बोलाउने निर्णय गरेको प्रवक्ता नारायणकाजी श्रेष्ठले जानकारी दिए । तर बैठकको मिति भने तय नभइसकेको उनले बताए ।  विकसित पछिल्ला घटनाक्रमहरुबारे छलफल गर्न दुवै कमिटिका बैठक डाक्ने निर्णय सचिवालय बैठकले गरेको हो।

पार्टीको आधिकारिकता दिन निर्वाचन आयोगमा बुझाएको निवेदनबारे यथाशीघ्र निर्णय लिन समेत सचिवालय बैठकले आग्रह गरेको छ । यसअघि प्रचण्ड–नेपाल समूहले गरेका निर्णयलाई समेत आयोगले अभिलेखीकरण गरेको थिएन ।

सर्वोच्च अदालतको आदेश अनुसार प्रतिनिधिसभा अधिवेशन फागुन २३ गते अपराह्न ४ बजेका लागि आह्वान गर्न सोमवार बिहान बसेको मन्त्रिपरिषद् बैठकले राष्ट्रपतिसमक्ष सिफारिस गर्ने निर्णय गरेको छ ।