दुई वर्षभित्र ग्रामीण मूलबाटो कालोपत्र गरिने

काठमाडौं । इटहरी उपमहानगरपालिका प्रमुख द्वारिकलाल चौधरीले आगामी दुई वर्षभित्र नगरका सम्पूर्ण ग्रामीण क्षेत्रका मूलबाटो कालोपत्र गर्ने कार्य सम्पन्न हुने बताउनुभएको छ । 

इटहरी–४ को वडा कार्यालय भवनको आज शिल्यान्यास गर्दै उहाँले बहुवर्षीय सडक योजनाअन्तर्गत गाउँका मूलबाटो पाँच वटा कालोपत्र भइसकेका  र अन्य योजनामा काम भइरहेको जानकारी दिनुभयो । प्रमुख चौधरीले ग्रामीण जनतालाई उपमहानगरवासी भएको अनुभूति गराउन बाटो निर्माण कार्यलाई तीव्रता दिएको बताउँदै सत्तारुढ नेकपामा देखिएको विग्रहले नगरको विकासमा कुनै प्रभाव नपार्ने धारणा राख्नुभयो । 

उपप्रमुख लक्ष्मी गौतमले नगरमा हुने विकास निर्माण कार्यको गुणस्तरमा कुनै सम्झौता नहुने बताउँदै नगरवासीलाई आफ्नै भवनबाट सेवा प्रदान गर्न वडा कार्यालय भवन निर्माणलाई तीव्रता दिइएको जानकारी गराउनुभयो । 

उक्त वडा कार्यालय भवन रु ८६ लाख ४४ हजार ४४४ को लागतमा निर्माण हुनेछ ।  वडाध्यक्ष चन्द्र भट्टराई र उपमहानगरका इञ्जिनीयर जीवन घिमिरेले नगरका आठ वटा वडा कार्यालयको निर्माण सम्पन्न भइसकेको छ भने यस आर्थिक वर्षमा आठ वटा भवन निर्माण सम्पन्न गर्ने लक्ष्य रहेको जानकारी दिनुभयो । चार वटा वडा कार्यालय भवनको आगामी आर्थिक वर्षमा निर्माण गरिने नगरले जनाएको छ ।