वामदेव प्रचण्डसँगसँगै, नखुल्नुको कारण प्रचण्डले खुलाए

 नेपाल कम्युनिस्ट पार्टी (नेकपा) प्रचण्ड–माधव समूहका पुष्पकमल दाहाल प्रचण्डले उपाध्यक्ष वामदेव गौतम आफूहरुसँगै रहेको बताएका छन् । गौतम र आफूबीच निरन्तर सम्पर्क रहेको भन्दै प्रचण्डले उनको जोड अझैपनि एकतातिर रहेकाले दुबैतिर नखुलेको मात्रै दावी गरे । 

‘उहाँले सकिन्छ भने मिलाउनु पर्छ भनेर लाग्नुभएको छ । हामीले पनि उहाँको चाहनालाई सम्मान गर्दै समर्थन गरेका छौं’, सोमबार एक टेलिभिजन अन्तर्वार्तामा प्रचण्डले भने, ‘वामदेवजीले भन्नुभएअनुसार उहाँले पहल गर्छु भन्नु भएको छ । उहाँ आफ्नै ढंगले सोच्ने नेता हुनुहुन्छ । हामी भन्दा टाढा हुनुहुन्न ।’

जनयुद्धकालदेखि नै आफ्नो वामदेवसँग विशेषखालको सम्बन्ध रहेको स्मरण गर्दै प्रचण्डले  भने, ‘जसले हिजो युद्धलाई शान्तिमा रुपान्तरण गर्न भूमिका खेल्नु भएको छ । युद्ध मैदानमै गएर गणतन्त्रमा जाने लाइनमा हस्ताक्षर गराउनु भएको छ । उहाँ हामीबाट टाढा जाने कुरा छैन ।’

तर, प्रचण्डले तत्काल केपी ओलीसँग एकता सम्भव नभएको पनि बताए । ‘कमिजोरीप्रति पश्चाताप गर्नुभयो भने संसद् भंग भएकोमा पश्चाताप गर्नुभयो भने पार्टी एकता असम्भव छैन’, उनले भने, ‘ओलीबाट यो सम्भव छैन । राजनीति हो अब २÷४ वर्षपछि हुनसक्छ । अहिले सम्भव देख्दिनँ । केपीजीले इतिकासको कलंकको टीका लगाइसक्नुभयो’ 
प्रचण्डले ओलीले विघटन गरेको संसद् पुनर्स्थापना कुनैपनि हालतमा हुनुपर्नेमा जोड दिए ।