किन पाईन्न् कोरोना बिमाको सहज भुक्तानी ?

पत्रपत्रिकाबाट

मंगलबार, ०४ कार्तिक २०७७, ०८ : २१
किन पाईन्न् कोरोना बिमाको सहज भुक्तानी ?

काठमाडौँ । कोभिड–१९ संक्रमितको उपचार खर्च सम्बन्धित बिमा कम्पनीले बेहोर्नुपर्ने सरकारी निर्णय भए पनि बिमितले तत्काल यो सुविधा नपाउने भएका छन् । बिमा कम्पनीहरूले तोकिएको समयमा दाबी भुक्तानी नगर्दा यस्तो अवस्था आएको हो ।

संक्रमितले सुरुमा आफ्नै खर्चबाट उपचार गराउनुपर्नेछ । त्यसपछि मात्र कम्पनीबाट शोधभर्ना पाइने बिमा समितिका कार्यकारी निर्देशक राजुरमण पौडेलले जानकारी दिए । ‘सुरुमा बिमितले आफ्नै खर्चमा उपचार गर्नुपर्छ,’ उनले भने, ‘सबै कागजात पुर्‍याएर आएपछि बिमा कम्पनीबाट दाबी भुक्तानी पाइन्छ ।’ आइतबारदेखि सर्वसाधारणको उपचार खर्च बिरामी आफैंले बेहोर्नुपर्ने निर्णय सरकारले गरेको छ ।

यो निर्णयपछि अस्पतालहरूले बिरामीबाट उपचार शुल्क लिन थालेका छन् । बिमा कम्पनीबाट तत्काल दाबी भुक्तानी नपाउने भएपछि बिमित मर्कामा परेका छन् । ‘सरकारले उपचार आफैं गर्नू भन्छ,’ एक संक्रमितले भने, ‘बिमा कम्पनीले भुक्तानी दिने कहिले हो, यस्तो बेलामा कसरी उपचार खर्च जुटाउनु रु’ जोखिम उच्च भएको समयमा सरकार आफ्नो जिम्मेवारीबाट पछि हटेकाले समस्या भएको उनको गुनासो छ ।

‘अप्ठ्यारो पर्दा सहज होला भनेर बिमा गरिएको हो,’ उनले थपे, ‘चाहिएका बेलामा भुक्तानी नपाएपछि के काम लाग्यो र रु’ बिमा समितिको कमजोरीका कारण बिमितले अप्ठ्यारो अवस्थामा दाबी भुक्तानी पाउन नसकेको जानकारहरू बताउँछन् । स्वास्थ्य बिमाको मापदण्डअनुसार बिमितको बिमा पोलिसीबाटै अस्पतालले खर्च कटाउनुपर्ने र बिमांकभन्दा बढी खर्च आएमा त्यो मात्र व्यक्ति स्वयंबाट लिनुपर्ने पूर्वअर्थसचिव रामेश्वर खनालले बताए । यही सिद्धान्तअनुसार बिमा कम्पनीले काम गर्नुपर्ने उनको भनाइ छ ।

बिमा कम्पनीले समयमै भुक्तानी दिँदैनन् भने त्यसको जिम्मेवार बिमा समिति हुनुपर्ने उनले बताए । ‘मापदण्डअनुसार तोकिएको समयमा दाबी भुक्तानी नगर्ने कम्पनीको लाइसेन्स खारेज गर्नेसम्मको अधिकार समितिसँग छ,’ उनले भने, ‘यस्तो बेलामा नियामक निकाय कम्पनीले मानेनन् भनेर रोइकराइ गरेर बस्ने होइन । निर्देशन प्रभावकारी रूपमा कार्यान्वयन गराउन एक्सनमा जाने हो ।’ कान्तिपुरमा खबर छ ।

प्रतिक्रिया दिनुहोस