काठमाडौं । कर्णाली प्रदेशका मुख्यमन्त्री महेन्द्रबहादुर शाहीविरुद्ध सत्तारुढ दल नेकपाकै सांसदले संसदीय दलमा अविश्वास प्रस्ताव दर्ता गराएका छन् । ४० सदस्यीय कर्णाली प्रदेशसभामा नेकपाका ३३ सांसद छन् । तीमध्ये १८ जनाले संसदीय दलका नेता एवं मुख्यमन्त्री शाहीविरुद्ध अविश्वास प्रस्ताव दर्ता गराएका हुन् । अविश्वास प्रस्ताव दर्तासँगै सिंगो नेकपामा हलचल पैदा भएको छ । सही व्यवस्थापन नभए यसबाट पार्टी एकतामै धक्का लाग्ने चिन्ता व्यक्त गरिएको छ ।
यामलाल कँडेलको नेतृत्वमा आइतबार मुख्यमन्त्री कार्यालय पुगेका १८ जना सांसदले शाहीविरुद्धको अविश्वास प्रस्ताव नेकपा संसदीय दलका प्रमुख सचेतक गुलाबजंग शाहलाई बुझाएका हुन् । शाही पूर्वमाओवादी र कँडेल पूर्वएमाले खेमाका हुन् । मुलुकमा मुख्यमन्त्रीविरुद्ध अविश्वास प्रस्ताव दर्ता भएको यो पहिलो पटक हो ।
प्रभावकारी हुन नसकेपछि अविश्वास प्रस्ताव दर्ता गरेका हौं’, कँडेलले भने, ‘दलको विधानबमोजिम बैठक आयोजना गरेर अविश्वास प्रस्तावलाई निर्णय गर्न÷गराउन अनुरोध गर्दछौं ।’अविश्वास प्रस्तावमा मुख्यमन्त्री शाहीका कारणले जनस्तरमा पार्टी र सरकारको उपस्थिति फितलो भएको आरोप लगाइएको छ । ‘अतः नेकपा प्रदेश संसदीय दलको विधानबमोजिम संसदीय दलको प्रमुखविरुद्ध अविश्वासको प्रस्ताव दर्ता गरेका छौं’, प्रस्तावमा भनिएको छ ।
हस्ताक्षरकर्तामध्येका एक तत्कालीन नेकपा माओवादीबाट निर्वाचित सांसद धर्मराज रेग्मीले अविश्वास प्रस्ताव दर्ता भएसँगै संसदीय दलको नेताले बैठक आह्वान गर्न नपाउने बताए । ‘दलको विधानअनुसार १५ दिनभित्र प्रमुख सचेतकले बैठक आह्वान गरेर अविश्वास प्रस्तावका विषयमा छलफल र निर्णय गर्नुपर्छ,’ उनले भने, ‘हामी दलको बैठकमा हुने निर्णय स्वीकार गर्न तयार छौं ।’
मुख्यमन्त्री महेन्द्रबहादुर शाहीविरुद्ध सत्तारुढ दल नेकपाकै सांसद यामलाल कँडेलको नेतृत्वमा अविश्वास प्रस्ताव दर्ता भएको हो । शाही पूर्वमाओवादी र कँडेल पूर्वएमाले खेमाका हुन् ।
पार्टी एकतामा धक्का लाग्ने चिन्ता
४० सदस्यीय कर्णाली प्रदेशसभामा नेकपाका ३३ सांसद छन् । तीमध्ये पूर्वएमाले खेमाबाट २० र पूर्वमाओवादी पक्षबाट १३ जना छन् । वर्तमान सरकार गठन हुँदा पनि पूर्वएमाले खेमाले अन्तिमसम्म कँडेललाई मुख्यमन्त्री बनाउन खोजेको थियो । तत्कालीन समयमा नेकपाका अध्यक्षद्वय केपी शर्मा ओली र पुष्पकमल दाहालबीच भएको सहमतिअनुसार कर्णाली र सुदूरपश्चिम प्रदेश तत्कालीन माओवादीको भागमा प(यो । त्यसकै आधारमा कर्णाली प्रदेशमा तत्कालीन माओवादीका नेता शाही संसदीय दलको नेता र मुख्यमन्त्री चयन भएका हुन् । ‘यो राजनीतिक सहमतिका आधारमा बनेको सरकार हो,’ सरकारको प्रवक्तासमेत रहेकी भूमि व्यवस्था, कृषि तथा सहकारीमन्त्री विमला केसीले भनिन्, ‘सरकार रहने र नरहनेभन्दा पनि यसले समग्र पार्टी एकता र राष्ट्रिय राजनीतिमै प्रभाव पार्छ ।’ नागरिक दैनिकमा खबर छ ।
प्रतिक्रिया दिनुहोस
पत्रपत्रिकाबाट
सोमबार, २६ असोज २०७७, ०७ : ५५
लेखकबाट थप
सम्बन्धित समाचारहरु
कर्णालीका हिमाली जिल्लासमेत औलोको जोखिममा
कर्णालीमा पुग्यो पाठ्यपुस्तक
प्रतिप्रश्न उठ्न नदिने गरी काम गर्ने मुख्यमन्त्री कँडेलको प्रतिबद्धता
नवनियुक्त मुख्यमन्त्री कँडेलले लिए शपथ
कर्णालीको मुख्यमन्त्रीमा यामलाल कँडेल नियुक्त
‘कर्णालीको विकासका लागि भौतिक पूर्वाधार निर्माण अपरिहार्य’