पाँच किलो अफिमसहित श्रीमानश्रीमती पक्राउ

दाङ । दाङको तुलसीपुरबाट पाँच किलो अफिमसहित दुई जना पक्राउ परेका छन । तुलसीपुरको गुम्राह चोकबाट गएराति अफिमसहित श्रीमान्श्रीमती पक्राउ परेको दाङ प्रहरीले जनाएको छ । 

पक्राउ पर्नेमा रोल्पा थबाङ घर भई हाल तुलसीपुर बस्दै आएका ४६ वर्षका कर्म बुढा र उनकी श्रीमती ४५ वर्षका राजकुमारी बुढा रहेका छन् । जिल्ला प्रहरी कार्यालय दाङका एसपी गणेश चन्दले रोल्पाबाट दाङ ल्याउन लागेको विशेष सूचनाको आधारमा उनीहरुलाई अफिमसहित पक्राउ गरेको जानकारी दिए ।

एसपी चन्दले उनीहरुलाई जिल्ला प्रहरी कार्यालय दाङबाट खटेको बिशेष प्रहरी टोलीले पक्राउ गरेको बताए । घटनाबारे थप अनुसन्धान भइरहेको प्रहरीको भनाइ छ ।