अफगानिस्तानमा बाढीका कारण एकै दिन एक सय दस जनाको मृत्यु

एजेन्सी । अफगानिस्तानमा बाढीका कारण एकै दिन एक सय दस जनाको मृत्यु भएको छ । 

पछिल्लो २४ घण्टामा उनीहरुको मृत्यु भएको र अरु एक सय ५० जना घाइते भएको अधिकारीहरुले जानकारी दिएका छन् । ती घटना देशका विभिन्न प्रान्तमा भएका हुन् ।

स्थानीय अधिकारीहरुका अनुसार पार्वान प्रान्तमा मात्रै ८५ जनाको मृत्यु भएको छ भने १ सय १० जना घाइते भएका छन् ।  टोलो न्युजले कतिपय ठाउँमा उद्धारकर्ताहरुले समेत प्रभावकारी काम गर्न नसकेको र कतिपय व्यक्तिको शव पनि नभेटिएको समाचार सम्प्रेषण गरेको छ ।  

अर्को बढी प्रभावित देखिएको चरिकार क्षेत्रमा खटिएका एक उद्धारकर्ताले हराइरहेकाहरुको शव भेट्टाउन सकिन्छ कि भनेर गरिएको खोजी कार्य गाह्रो भइरहेको बताए ।  

अधिकारीहरुका अनुसार पीडितमध्ये अधिकांश महिला र बालबालिका रहेका छन् । उनीहरुले स्थानीय समय अनुसार बुधबार दिउँसो झण्डै ३ बजेतिर विनाशकारी बाढी आएको थियो । 

त्यसैगरी कापिसा प्रान्तको कोभान्ड जिल्लामा बाढीका कारण कम्तीमा दश जनाको मृत्यु भएको छ भने अरु दश जना घाइते भएका छन् ।  त्यस बाहेक हेस ए अवाल ए कोहिस्तान, हेस ए डोवोम ए कोहिस्तान, निजार्ब जिल्लालगायतका ठाउँ पनि बाढीबाट बढी प्रभावित भएका छन् । (एएनआई)