कोरोना रोकथाममा सरकारले अहिले सम्म कति खर्च गर्यो ?

काठमाडौं । कोभिड –१९ को रोकथाम र उपचारका लागि सरकारले साउन मसान्तसम्म झण्डै १२ अर्ब खर्च गरेको छ।  सरकारका प्रवक्ता डा युवराज खतिवडाले कोरोना नियन्त्रणमा भएको खर्च विवरण सार्वजनिक गरेका हुन् ।

साउन मसान्तसम्म तीनै तहबाट रु ११ अर्ब ९८ करोड ३१ लाख ८० हजार खर्च भएको उनले बताए।  सो अन्तर्गत औषधि, स्वास्थ्य सामग्री, स्वास्थ्य पूर्वाधार, जनशक्ति परिचालन, क्वारेन्टिन र अन्य शीर्षकमा रु चार अर्ब ८१ करोड नौ लाख ९८ हजार खर्च भएको छ ।

सङ्घीय संचित कोषबाट विभिन्न मन्त्रालयबाट हालसम्म रु पाँच अर्ब ८४ करोड ७९ लाख ९४ हजार, प्रदेश सरकारका तर्फबाट रु एक अर्ब ४९ करोड ७० लाख ४५ हजार र स्थानीय तहबाट रु एक अर्ब ३५ करोड २० लाख ५९ हजार स्रोत व्यवस्थापन भएको छ।      

केन्द्र सरकारको कोरोना रोकथाम र उपचार कोषमा हालसम्म रु दुई अर्ब ७५ करोड जम्मा भएको पनि अर्थमन्त्री डा. खतिवडाले जानकारी दिए।