छुट्टाछुट्टै स्थानमा भएका सवारी दुर्घटनामा ५ जनाको मृत्यु

काठमाडौं । रुपन्देही, चितवन र सप्तरीका विभिन्न स्थानमा भएका छुट्टाछुट्टै सवारी दुर्घटनामा परी ५ जनाको मृत्यु भएको छ ।

रुपन्देहीको रोहिणी गाउँपालिका-४ छिपागडस्थित सडकमा लु.२ च ६७५६ नम्बरको कार सडकबाट १० मिटर तल खसेर शुक्रबार राति दुर्घटना हुँदा कारमा सवार सिद्धार्थनगर नगरपालिका-४ बस्ने २७ बर्षीय देवेन्द्र चौधरी समेत ३ जनाको मृत्यु भएको छ ।  

दुर्घटना परी गम्भीर घाइते भएका उनीहरुको भिम अस्पताल भैरहवातर्फ लैजाने क्रममा बाटोमै मृत्यु भएको हो । साथै दुर्घटनामा घाइते भएका कारमा सवार ओमसतिया गाउँपालिका-४ बस्ने ३४ बर्षीय अनिल यादवलाई भिम अस्पताल हुँदै थप उपचारको लागि मेडिकल कलेज भैरहवा पठाइएको छ ।

यसैगरी चितवनको कालिका नगरपालिका-२ भट्ट चोकमा ना.३० प ५४९२ नम्बरको मोटरसाइकलको ठक्करबाट पैदलयात्री सोही ठाउँ बस्ने ८० वर्षीय बुद्धिमान दराईको शुक्रबार साँझ मृत्यु भएको छ । मोटरसाइकलको ठक्करबाट गम्भीर घाइते भएको उनको पुरानो मेडिकल कलेज भरतपुरमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ ।

सप्तरीको शम्भुनाथ नगरपालिका-१ स्थित सडकमा पनि स. १० प ८४९८ नम्बरको मोटरसाइकलको ठक्करबाट साईकलयात्री सोही ठाउँ बस्ने ३५ बर्षीय देवनाथ यादवको शुक्रबार राति घटनास्थलमै मृत्यु भएको । साथै दुर्घटनामा घाइते भएका मोटरसाइकल चालक सोही नगरपालिका-७ बस्ने २६ बर्षीय अमृत चौधरीलाई उपचारको लागि युनिक अस्पताल रुपनी पठाइएको छ ।

दुर्घटनाका सम्बन्धमा स्थानीय प्रहरीले थप अनुसन्धान गरिरहेको  नेपाल प्रहरीको केन्द्रीय समाचार कक्षले जनाएको छ ।