दुई अध्यक्षबीचको भेटवार्ता सकियो, बुधबार फेरि छलफल गर्ने

काठमाडौँ । नेपाल कम्युनिष्ट पार्टी (नेकपा) अध्यक्षद्वय केपी शर्मा ओली र पुष्पकमल दाहाल प्रचण्डबीच बालुवाटारमा भएको छलफल आजका लागि सकिएको छ । दुई अध्यक्षबीच बुधबार फेरि छलफल हुने बताइएको छ ।

मंगलबार ओली र दाहालबीच करिब सवा घण्टा वार्ता भएको थियो । दाहालका प्रेस संयोजक विष्णु सापकोटाका अनुसार दुई अध्यक्षबीच बुधबार फेरि छलफल हुने भएको छ ।

निकास ननिस्किएपछि नेकपाको स्थायी कमिटी बैठक साउन २ गतेसम्मका लागि स्थगित भएको छ । बहुमत सदस्यले प्रधानमन्त्री र पार्टी अध्यक्ष दुवै पदबाट ओलीको राजीनामा मागेपछि नेकपाको शक्ति संघर्ष उत्कर्षमा छ ।

यही विवादले पार्टी फुटको नजिक पुग्न लागेपछि अध्यक्ष दाहाल र माधवकुमार नेपाल समूहले लगातार बैठक स्थगित गरेर सहमतिको लागि भन्दै ओलीसँग संवाद गर्दै आएका छन् ।