भीम रावलमाथी खनिए प्रधानमन्त्रीका मुख्य सल्लाहकार रिमाल

काठमाडौं । प्रधानमन्त्रीका मुख्य सल्लाहकार विष्णु रिमाल र नेकपा स्थायी समिति सदस्य भीम रावलबीच आरोप प्रत्यारोप चलेको छ । नेकपाको हिजो बुधबारका लागि तय भएको स्थायी समिति बैठक रोकिएको कारणलाई लिएर रावल र रिमालबीच आरोप प्रत्यारोप शुरु भएको हो ।

नेकपाले पार्टीका सबै स्थायी समिति सदस्यहरुको कोरोना परिक्षण नसकिएको, नेताहरुको सुरक्षा गार्डहरुमै कोरोना देखिएको कारण जनाउदै नेकपाले बैठक स्थगित गरेको थियो । बैठक स्थगित पछि प्रधानमन्त्रीका मुख्य सल्लाहकार विष्णु रिमालले एक रेडियोलाई अन्र्तवार्ता दिदै स्थायी समिति सदस्य भीम रावलको सुरक्षा गार्डमा पनि कोरोना देखिएको र बैठक स्थगित हुनुको एउटा कारण त्यो पनि रहेको बताएका थिए ।

स्थायी समिति बैठक स्थगित भएपछि नेता रावलले भने बैठक रोक्ने कुरालाई राजनीतिको भद्दा रुप भएको टिप्पणी गरेका छन् । उनले ‘म कहाँ एक महिनादेखि नरहेका र त्यसअघि पनि मेरो निकट सम्पर्कमा नरहेका प्रहरीमा कोरोना संक्रमण देखिनुलाई प्रमका सल्लाहकारले मसँग केही नबुझी बैठक स्थगनको एउटा कारण भन्दै रेडियोमा फुक्न लगाउनु र स्थायी कमिटीका सबै सदस्यहरूको पिसिआर परीक्षण नभएकाले बैठक स्थगित गरियो भन्नु षड्यन्त्रकारी र गैरजिम्मेवार राजनीतिको भद्दा स्वरूप हो,’ रावलले बैठक स्थगित पछि ट्वीट गर्दै भनेका छन् ।

तर फेरि रिमालले रावलमाथी पनि कटाक्ष गदै प्रतिजवाफ दिएका छन् । ‘बैठक राख्ने वा रोक्ने म आधारिक व्यक्ति पनि हैन् । यो आरोप, प्रत्यारोप  किन र के का लागि ? होला, यहाँको जत्तिको महान मति र बुद्धि म मा नहोला तर, उही पार्टीका सहकर्मीसंग कस्तो व्यबहार गर्ने सामान्य शिष्टाचार मेरो गुरूहरूले सिकाउनु भएको छ ।’ रिमालले भनेका छन् ।