एक भिखारीले मन्दिरलाई दिए आठ लाख भारु

भारत । भारतको दक्षिणी राज्य आन्ध्र प्रदेशको विजयवाडा निवासी एक भिखारीले विगत सात वर्षको दौरान झण्डै आठ लाख भारु दानमा दिएका छन् । 

७३ वर्षिया यादी रेड्डीले त्यहाँको साइबाबा मन्दिरलाई उक्त रकम दान दिएका हुन् । रेड्डीले दान गरेर आफूलाई फाइदा नै भएको बताए । उनले दानको कृपाले आफ्नो भिख रकम बढेको बताए । यादी आफूले दान गरेको मन्दिरबाहिर नै भिख माग्ने गर्छन् । मन्दिर प्रशासनले यादीको सराहना गरेको छ । 

रेड्डी विगतमा रिक्सा चलाएर आफ्नो जिविका चलाउथें । घुडाँमा समस्या आएपछि उनले उक्त रोजगारी त्यागेका थिए । त्यसपछि उनी भिख मागेर जीवनयापन गरिरहेका छन् ।

मन्दिरमा दान गरेकै कारण मानिसले उनलाई चिन्न थालेको भन्दै रेड्डीले खुसी व्यक्त गरे ।

‘मैले आजसम्म मन्दिरमा आठ लाख भारु दानमा दिएँ । भावी दिनमा सबै रकम मन्दिरलाई नै दान गर्छु,’ रेड्डीले बताए ।

मन्दिर प्रशाशनका अनुसार रेड्डीले सहयोग गरेको रकमले मन्दिरको कैयौं विस्तारको काममा प्रयोग भएको छ ।